Emisari i BE-së për dialogun Kosovë-Serbi, Peter Sorensen, është pritur në selinë e NATO-s nga zëvendëssekretarja e Përgjithshme e NATO-s, Radmila Shekerinska.

Sipas një komunikate të lëshuar nga NATO, Shekerinska përsëriti “angazhimin e fortë” të NATO-s ndaj Ballkanit Perëndimor, një rajon me rëndësi strategjike për Aleancën.

Ajo theksoi partneritetin midis NATO-s dhe BE-së në ruajtjen e paqes dhe stabilitetit në Kosovë dhe më gjerë.

Përmes misionit të KFOR-it, ajo tha se "NATO vazhdon të bëjë atë që është e mundur ushtarakisht në terren për të mbrojtur paqen, për të mirën e të gjithë njerëzve që jetojnë në Kosovë. Por zgjidhja përfundimtare për stabilitet të qëndrueshëm rajonal është politike”.

“Për këtë qëllim, NATO vazhdon të mbështesë plotësisht dialogun e udhëhequr nga BE-ja për normalizimin e marrëdhënieve midis Beogradit dhe Prishtines dhe përpjekjet e Përfaqësuesit Special Sorensen”.

Shekerinska theksoi gjithashtu “nivelin e shkëlqyer” të bashkëpunimit midis NATO-s dhe BE-së. Ajo theksoi se koordinimi i vazhdueshëm do të jetë çelësi për të çuar përpara dialogun e udhëhequr nga BE-ja dhe se aleatët kanë rënë dakord të rrisin mbështetjen e tyre për përpjekjet e normalizimit nga BE-ja.

Ambasadori Sorensen mori pjesë gjithashtu në një takim të Këshillit të Atlantikut të Veriut, duke përfshirë partnerët e NATO-s që kontribuojnë me personel në KFOR, thuhet në komunikatë.

“KFOR kontribuon në ruajtjen e një mjedisi të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në koordinim me Policinë e Kosovës dhe misionin e BE-së për Sundimin e Ligjit (EULEX), në rolet e tyre përkatëse si reagues të sigurisë”./Express/