Luciano Spalletti shpjegon pozicionimin e Pierre Kalulu te Juventusi, zbulon një problem fizik të Kenan Yildiz dhe siguron se “nuk e duan Mauro Icardin” nga Galatasaray.

“Bianconerët” shpërthyen në “Stadio Tardini” mbrëmjen e sotme me një fitore 4-1, ku qendërmbrojtësi Gleison Bremer realizoi një dopietë të rrallë, ndërsa golat e tjerë u shënuan nga gjuajtja akrobatike e Weston McKennie dhe një “tap-in” i Jonathan David.

Parma arriti të shënojë vetëm falë një autogoli komik të Andrea Cambiaso pas krosimit të Alessandro Circati, ndërsa goli i Lois Openda në shtesë u anulua për pozicion jashtë loje.

“Është më mirë të mos shikosh statistikat, sepse shpesh ato vijnë nga situata statike që nuk ndikojnë në rezultat, pasi futbolli ka të bëjë më shumë me ndryshime të papritura të ritmit, duele dhe topa të dytë. Pikërisht aty hyn në lojë ndeshja e vërtetë. Kush është më i zgjuar në ato momente, mund ta fitojë ndeshjen,” i tha Spalletti “DAZN Italias”.

Në intervistën pas ndeshjes, Gleison Bremer dhe Weston McKennie e quajtën trajnerin “unik” dhe thanë se nuk kishin punuar kurrë me dikë si ai.

“Nëse e kanë thënë këtë, normalisht që të bën qejfin. Ajo që është thelbësore për mua është të kem një raport me një skuadër që dëshiron ta shijojë futbollin, sepse kështu lirohet cilësia që pamë sot. Ata nuk duhet kurrë të shkëputen nga ndeshja, por të jenë gjithmonë të lidhur dhe gati për situatën e radhës. Çdo ndeshje është një hap për të mësuar dhe nuk është kurrë përfundimtare; është një proces që vazhdon. Gjithsesi, u thashë që të mos më lavdërojnë mua, por shokët e skuadrës. Ky grup ka potencialin të bëhet një ekip i madh, falë edhe unitetit dhe kënaqësisë që kanë në stërvitje dhe në ndeshje. Ata kombinojnë entuziazmin me vendosmërinë, pavarësisht se çfarë u kërkon”, shtoi ai.

Pierre Kalulu shtyhet shpesh përpara në krahun e djathtë te Juventusi i Spallettit, në një rol të ngjashëm me Giovanni Di Lorenzo te Napoli, dhe ishte ai që asistoi për golin me volej të McKennie.

“Ky pozicion është vendimtar për të dhënë alternativa dhe për të krijuar pak kaos në markimin e skuadrës kundërshtare. Ai ka aftësinë të nisë vrapimet në momentin e duhur. Një ekip duhet të ketë këtë aftësi për të kaluar nga i ngushtë në i shtrirë brenda një çasti, duke ditur kur të luajë shkurt dhe kur gjatë,” vuri në dukje Spalletti.

“Meqë përmende Di Lorenzon, dua t’i dërgoj urimet e mia më të mira që të kthehet sa më shpejt në fushë, sepse i meriton të gjitha të mirat. Kur e pashë të dëmtuar ashtu, na dhembi të gjithëve. Ai është mjeshtër në atë pozicionim mes linjave, është një lojtar i kompletuar, dhe Kalulu po i afrohet atij niveli gjithashtu. Ai dikton ritmin për shokët e skuadrës”, tha ai.

Kenan Yildiz u pushua në mesjavë në barazimin 0-0 ndaj AS Monaco në Ligën e Kampionëve dhe startoi mbrëmjen e sotme, por u zëvendësua në pushim pasi u ankua për probleme muskulore.

“Yildiz na tha gjatë pjesës së parë se ndjente pak dhimbje, por se mund ta çonte deri në pushim,” shpjegoi Spalletti.

“I besuam, por tani ka pak dhimbje edhe kur ecën, ndaj duhet ta vlerësojmë situatën, megjithatë nuk duhet të jetë diçka serioze. Mendoj se do të jetë e vështirë ta kemi gati për të enjten.”

Afati kalimtar mbyllet nesër dhe Juve tashmë ka siguruar dy lojtarë sot, duke marrë Jeremie Boga nga OGC Nice në huazim dhe Emil Holm nga Bologna në një shkëmbim me Joao Mario.

Ata janë ende në kërkim të një sulmuesi qendre, por para nisjes së ndeshjes drejtori Giorgio Chiellini përjashtoi marrëveshjet për Mauro Icardi, Jean-Philippe Mateta ose Randal Kolo Muani.

“Më pyesin për Icardin dhe Osimhen në konferencë për shtyp, ndaj mund të flas vetëm mirë për Icardin si lojtar kur ishte në ekipin tim,” shpjegoi Spalletti.

“Kishte disa situata që ai i sillte në dhomat e zhveshjes dhe kishin të bënin me jetën e tij private, gjëra që nuk i përkisnin dhomës së zhveshjes, ndaj duhej të flisja me të. Kur je në një dhomë zhveshjeje, nuk mund ta mbash derën hapur për çështje të tjera.

“Atëherë duhej të merrja një vendim dhe vendosa ta përjashtoja, ndaj ai reagoi sipas asaj situate. Ai është djalë i mirë, njeri i këndshëm dhe një sulmues fantastik. Por ne nuk e duam Icardin. A është në rregull kjo?

“Nëse flas mirë për dikë, menjëherë dalin titujt se dua ta transferoj, por nuk është e vërtetë. Ne po kërkojmë një lojtar me karakteristika të caktuara; nëse nuk e gjejmë, do të mbetemi kështu si jemi. Fundja, McKennie është po aq ‘vrasës’ sa kushdo tjetër, e patë sërish sonte”./GazetaExpress/