Luciano Spalletti u shpreh i kënaqur me paraqitjen e Juventusit kundër Romës, por i bëri thirrje skuadrës për përmirësime të mëtejshme: “Nëse nuk je modern në mënyrën si luan, do ta paguash.”
“Bardhezinjtë” e mposhtën Romën 2-1 në “Allianz Stadium” të shtunën, duke u afruar në vetëm një pikë larg verdhekuqve në vendin e katërt.
Pas intervistës për “Sky Sport Italia”, Spalletti analizoi paraqitjen e ekipit të tij në konferencën për shtyp pas ndeshjes.
“Roma është një skuadër që luan njësoj pavarësisht rezultatit. Nëse dëshiron të krijosh hapësira, duhet të ulësh bllokun mbrojtës, por unë nuk ndihem kurrë rehat në stol kur skuadra mbrohet aq thellë,” tha trajneri i Juventusit.
“Si Conceiçao ashtu edhe Yildiz bënë punën e tyre mbrojtëse në pjesën e dytë. Ata e mbushën lojën edhe me elementë të tjerë. Duhet të bëjmë hapa përpara në këtë aspekt, por sa herë që e fitonim topin, ishim pranë shënimit të golit të tretë. Në pjesën e dytë ishim të mirë në shumë gjëra, pothuajse në gjithçka. Në pjesën e parë ishim gjithmonë pak me vonesë për të mbuluar anësorët e tyre; na detyruan të tërhiqeshim dhe vuajtëm, por e dinim që do të ishte kështu”, u shpreh ai.
Juventusi ka fituar gjashtë nga shtatë ndeshjet e fundit në të gjitha garat dhe ka tri fitore radhazi në Serie A.
A po e shijon Spalletti faktin që skuadra më në fund po ecën në rrugën e duhur?
“Kënaqësi… kam frikë se nuk e kam ndjerë kurrë vërtet. Mendoj se mund të kem ndonjë problem,” u përgjigj ai me buzëqeshje.
“Për mua, kënaqësia është t’i shoh lojtarët siç ishin në dhomat e zhveshjes; duke u përqafuar, të lumtur dhe duke buzëqeshur. Lumturia ime vjen gjithmonë si pasqyrim i njerëzve përreth meje. Kjo është ajo që më bën të ndihem mirë. Ka gjëra që patjetër duhet t’i përmirësojmë, sepse janë brenda mundësive tona, por nuk po gjejmë vazhdimësi. Duhet të mësohemi me këtë ndryshim të vazhdueshëm të ritmit të lojës. Roma gjithmonë sjell dikë brenda një rrezeje dy metrash nga ti. Duhet të mësohemi me këtë betejë lokale. Ndonjëherë nuk është 11 kundër 11, por duele individuale 1 kundër 1. Roma i fitoi gjithmonë topat e dytë në pjesën e parë,” vazhdoi ai.
“Nëse reagon, je gjithmonë me vonesë. Nuk ka të bëjë me reagimin, por me parashikimin e asaj që po vjen. Mbrojtësit duhet të përfshihen më shumë kur e kemi topin. A luan futboll vetëm për t’ia marrë topin dikujt? Çfarë kënaqësie është kjo? Roma e bën ndryshe. Ata linin vetëm një lojtar pas; të gjithë të tjerët ishin brenda zonës”, tha ai.
Spalletti shpjegoi më pas mentalitetin që dëshiron të shohë nga skuadra e tij në vazhdim.
“Nuk mund të rrish aty duke pritur vërshëllimën e fundit të arbitrit vetëm sepse po fiton 2-1. Është mentalitet i gabuar; herët a vonë, në futbollin modern, do ta paguash,” tha ai.
“Nëse nuk je modern në mënyrën si luan, do ta paguash. Më shqetëson shumë kur e shoh skuadrën time të ngujuar në skajin e zonës, e paaftë të dalë nga faza mbrojtëse; kjo më jep ankth. Harroje kënaqësinë. Kjo më zemëron jashtë mase dhe më bën vërtet të ndihem keq”, përfundoi ai.
Trajneri i Romës, Gian Piero Gasperini, foli gjithashtu në konferencë për shtyp, duke i bërë thirrje klubit të sigurojë përforcime në afatin kalimtar të janarit./GazetaExpress/
