Federata Mbretërore Spanjolle e Futbollit (RFEF) ka kërkuar shtimin e dy stadiumeve të reja në listën e saj për Kupën e Botës 2030, pas largimit të dy opsioneve fillestare.

Spanja synon të ketë gjithsej 11 stadiume pritëse, por pritet që të paktën një prej tyre të refuzohet nga FIFA.

Numri total i stadiumeve për turneun, që do të organizohet nga Spanja, Portugalia dhe Maroku, pritet të jetë mes 16 dhe 18.

Portugalia dëshiron të mbajë tre stadiumet e saj, ndërsa Maroku këmbëngul për gjashtë, edhe pse rrezikon të humbasë një.

Së fundmi, FIFA ka kryer inspektime në stadiumet kandidate, por para këtyre kontrolleve dolën nga lista “La Rosaleda” në Malaga dhe “Riazor Stadium” në La Coruña, për shkak të pasigurive financiare rreth projekteve të tyre.

Si zëvendësim, RFEF shpreson që projekti “Nou Mestalla” në Valencia të pranohet si një nga stadiumet pritëse.

Ky stadium i ri i Valencias pritet të përfundojë në vitet 2027 ose 2028.

Ndërkohë, rajoni i Galicisë po shtyn për përfshirjen e stadiumit “Balaidos Stadium”, edhe pse kjo mbetet më pak e sigurt.

Aktualisht, stadiumet që konsiderohen si pritëse janë: “Camp Nou”, “RCDE Stadium”, “Metropolitano Stadium”, “Bernabeu”, “La Romareda”, “San Mames”, “Reale Arena”, “La Cartuja” dhe “Estadio Gran Canaria”.

Megjithatë, ka ende dyshime nëse ky i fundit do të mbetet në listë pas inspektimeve të FIFA-s./GazetaExpress/