Sonte do të mbyllet faza e ligës në Ligën e Kampionëve me një mbrëmje spektakolare futbolli, ku do të zhvillohen plot 18 ndeshje njëkohësisht, të gjitha nga ora 21:00.

Në lojë janë kualifikimi, renditja finale dhe prestigji evropian, ndërsa emocionet pritet të jenë në kulm, shkruan “Gazeta Express”.

Vëmendja kryesore do të jetë në Lisbonë, ku Benfica pret Real Madridin në një duel me peshë të madhe.

Madrilenët synojnë rezultat pozitiv për ta siguruar një pozicion më të favorshëm në fazën tjetër, ndërsa ekipi portugez e luan shansin e fundit për të mbetur në garë, duke e bërë këtë përballje tejet delikate dhe të paparashikueshme.

Një tjetër ndeshje e fortë do të zhvillohet në Gjermani, ku Borussia Dortmund do të përballet me Interin.

Dy skuadra me histori dhe ambicie evropiane, që pritet të ofrojnë një duel të hapur, intensiv dhe me ndikim të drejtpërdrejtë në renditje.

Në Itali, Napoli dhe Chelsea do të përballen në një sfidë ku presioni është maksimal për të dyja palët.

Objektivat janë të qarta dhe një hap fals mund të ketë pasoja serioze në vazhdimësinë e garës.

Barcelona do ta presë Copenhagenin me synimin për ta mbyllur fazën e ligës me fitore dhe për ta siguruar një vend në tetëshe, ndërsa Paris Saint-Germain do të luajë me Newcastle United në një duel që premton ritëm të lartë dhe intensitet maksimal, me kualifikimin ende të hapur.

Manchester City do ta kërkojë konfirmim përballë gjigantit turk Galatasaray, derisa Liverpooli hyn si favorit ndaj Qarabagut.

E gjigantin gjerman, Bayern Munich e pret një udhëtim i vështirë në Holandë, ku e pret PSV Eindhoven.

Në sfidat vendimtare përkatëse, ekipet favorite nuk e kanë luksin e gabimit.

Programi i mbrëmjes së sontme përfshin edhe përballje interesante si Arsenal – Kairat Almaty, Ajax – Olympiacos, Monaco – Juventus dhe Atletico Madrid – Bodo/Glimt, takime që pavarësisht diferencave në letër, mund të sjellin surpriza.

Në ndeshjet tjera, Eintracht Frankfurt e pret Tottenhamin në një duel ku çdo pikë ka rëndësi të madhe, Bayer Leverkusen do të sfidohet nga Villarreali në një sfidë teknike dhe të hapur, Union Saint-Gilloise e synon befasinë ndaj Atalantës, ndërsa Pafos dhe Slavia Praga do të luajnë për prestigj.

Xhiroja e fundit e fazës së ligës nuk është vetëm një formalitet. Është një provë karakteri, nervash dhe ambicieje.

Në fund të kësaj mbrëmjeje, do të mësohen emrat e skuadrave që do ta vazhdojnë rrugëtimin evropian dhe atyre që do t’ia japin lamtumirën Ligës së Kampionëve. /Gazeta Express