Marrëveshja u firmos sot në Shtëpinë e Futbollit nga Presidenti i FSHF-së, Armand Duka dhe Administratori i kompanisë “Air Albania”, Sinan Isik.
Për Presidentin Duka kjo marrëveshje e re dëshmon vazhdimësinë e bashkëpunimit të ngushtë mes Qendrës Sportive Kuq e Zi dhe Air Albania, një markë kombëtare me të cilën ndajmë të njëjtin vizion për promovimin e vlerave shqiptare.
“Jemi sot këtu për të ritheksuar një bashkëpunim që i ka dhënë vlerë jo vetëm sportit, por edhe një modeli të ri për mënyrën sesi futbolli shqiptar ndërvepron me botën e biznesit. Emri ‘Air Albania Stadium’ nuk është vetëm një emër komercial i vendosur mbi një impiant sportiv. Ai është dëshmi e një filozofie moderne, ku sporti, ekonomia dhe identiteti kombëtar ecin krah për krah.
Ky stadium ishte i pari në Shqipëri dhe ndër të parët në rajon që u pagëzua me një emër tregtar. Ishte një vendim novator, një hap i guximshëm, që tregoi se edhe në Shqipëri ka hapësirë për modele të qëndrueshme marketingu sportiv. Sot, me rinovimin e kësaj marrëveshjeje për pesë vitet e ardhshme, po tregojmë se ky treg jo vetëm që ekziston, por po zhvillohet.
‘Air Albania’ ka qenë dhe vijon të jetë një partner strategjik një kompani që e ka kuptuar rëndësinë e të qenë pjesë e emocioneve të përbashkëta, pjesë e imazhit ndërkombëtar të vendit tonë, pjesë e përfaqësimit të flamurit kuqezi brenda dhe jashtë fushës. Në emër të FSHF-së dhe QSKZK-së, dua ta falënderoj z. Sinan Isik dhe të gjithë bashkëpunëtorët e tij për këtë marrëveshje të re, për këtë akt besimi, për këtë angazhim afatgjatë”,- u shpreh Presidenti i FSHF-së.
Për administratorin e “Air Albania”, Sinan Isik ruajtja e këtij partneriteti garanton stabilitet dhe prestigj për impiantin më të rëndësishëm sportiv në Shqipëri, që mirëpret ndeshjet e Kombëtares, finalet e kompeticioneve kombëtare dhe sfida ndërkombëtare.
“Një moment i veçantë për ne si kompani, por edhe si qytetarë që ndjejnë përgjegjësi dhe krenari për të mbështetur futbollin shqiptar dhe vlerat që ai përfaqëson. Përmes kësaj marrëveshjeje me Qendrën Kombëtare Kuq e Zi dhe Federatën Shqiptare të Futbollit, Air Albania konfirmon përkushtimin e saj për të qenë më shumë se një kompani transporti ajror për të qenë një partner aktiv në jetën shoqërore, kulturore dhe sportive të vendit. Vendimi për të vijuar mbështetjen ndaj futbollit shqiptar dhe për ta lidhur sërish emrin e kompanisë sonë me stadiumin më të rëndësishëm të vendit është një tregues i qartë i besimit që kemi në të ardhmen e sportit shqiptar dhe në zhvillimin e shoqërisë sonë. Air Albania po ecën me hapa të sigurt drejt zgjerimit, duke rritur flotën, destinacionet dhe cilësinë e shërbimit, dhe me këtë bashkëpunim ne tregojmë se themeli ynë është i qëndrueshëm dhe synimi ynë është zhvillimi afatgjatë”, tha Sinan Isik.
