Raheem Sterling nuk mund të fillojë stërvitjen me shokët e rinj te Feyenoord, teksa pret për përfundimin e lejes së punës.

Sulmuesi u transferua përkohësisht te klubi i Eredivisie pas ndërprerjes me marrëveshje të përbashkët të kontratës me Chelsea muajin e kaluar.

Ky ishte një vendim surprizë nga ana e lojtarit 31-vjeçar për t’u bërë aventura e tij e parë jashtë Anglisë, duke iu bashkuar gjigantëve holandezë që aktualisht ndodhen në vendin e dytë në tabelë.

Sterling, i cili ka luajtur për Liverpool, Manchester City, Chelsea dhe Arsenal gjatë karrierës së tij, po pret përfundimin e lejes së punës përpara se të mund të stërvitet dhe të luajë ndeshje zyrtare me skuadrën e Robin van Persie.

Ai ende nuk ka luajtur asnjë ndeshje konkurruese këtë sezon, pasi ishte jashtë skuadrës te “Stamford Bridge”, dhe mungesa e formës fizike do të thotë se tifozët e Feyenoord mund të presin pak kohë për të parë yllin në aksion.

Eksperti i futbollit holandez, Marcel van der Kraan, beson se kjo lëvizje mund të jetë e suksesshme për mesfushorin e Anglisë:

“Mendoj se kjo është pikërisht ajo që i duhet Raheem-it. Ai vjen në një mjedis që ndoshta i duhet pas kohës së gjatë pa luajtur,” tha ai për “talkSPORT”.

“Tifozët e Feyenoordit po prisnin në radhë këtë mëngjes në aeroport. Ata këndonin për të dhe ai firmoste autografe. Do të hyjë në një stadium me 50,000 spektatorë çdo javë. Ata kanë një publik shumë besnik dhe të zëshëm. Edhe pa luajtur një top, ai tashmë është hero këtu. Ende duhet të shohim kur do të jetë në formë. Sepse ka stërvitur vetëm programe individuale gjatë tre, katër muajve të fundit. Nuk ka qenë pjesë e ndonjë ndeshjeje. Robin e di që duhet ta stërvisë me skuadrën në javët e ardhshme. Nuk do të luajë 90 minuta menjëherë.”

Van der Kraan shtoi: “Mendoj se ai më vonë do të bëjë ndryshimin për skuadrën e Robin van Persie, për të arritur vendin e dytë. Por nuk mund të luajë këtë të diel. Leja e punës është shumë e rëndësishme në këtë moment, sepse ai vjen nga Britania e Madhe dhe zyrtarisht nuk mund të stërvitet. Prandaj dyshoj se sot ai do të stërvitet me ekipin.”

“talkSPORT” raporton se gati 20 klube ishin të interesuara për Sterling para se ai të zgjidhte Feyenoord. Everton ishte një prej tyre, por prioriteti i Sterling ishte të gjejë minutazh të rregullt, diçka që ai e konsideronte më të realizueshme me klubin holandez.

“Jam i sigurt se Feyenoord është vendi i duhur për mua,” tha Sterling.

“Të luash jashtë ofron një sfidë krejt të re dhe mezi pres të filloj. Dua të falënderoj Feyenoordin, dhe veçanërisht Robin dhe drejtorin Dennis te Kloese për durimin dhe profesionalizmin gjatë këtij procesi.”

Ndërkohë, Van Persie beson se Sterling do të jetë një shtesë kyçe për skuadrën e tij, e cila ndodhet 17 pikë pas liderëve PSV. Ai deklaroi: “Të sigurosh një lojtar me cilësinë e Raheemit pas mbylljes së merkatos është e jashtëzakonshme. Karriera e tij flet shumë. Ai ka aftësinë të ndryshojë ndeshjet dhe jam i sigurt se do të na ndihmojë të arrijmë objektivat tanë në pjesën tjetër të sezonit.”/GazetaExpress/