E gjithë vëmendja në xhiron e gjashtë të Superligës në basketboll do të jetë në kryeqytet, aty ku Sigal Prishtina e luan derbin ndaj Pejës.
Pejanët në këtë takim hyjnë si lider me pikë të plota, derisa Prishtina ka katër fitore e një humbje.
Kryeqytetasit xhiron e kaluar fituan trilerin ndaj Bashkimit, derisa pejanët deklasuan Istogun.
Takimi mes Prishtinës e Pejës zhvillohet të shtunën nga ora 16:00.
Ekipi i dytë i tabelës, Trepça luan sërish në udhëtim, këtë herë ndaj Bashkimit.
Mitrovicasit do kërkojnë fitoren e dytë rresht në terrenin prizrenas, pasi një javë më herët mposhtën rivalin e tyre lokal, Prizrenin.
Xehetarët kanë katër fitore e një humbje, derisa prizrenasit tri fitore e dy humbje.
Kjo përballje do të luhet të dielën nga ora 19:00.
Golden Eagle Ylli do kërkojë këndelljen në shtëpi përballë Prizrenit.
Suharekasit janë jashtë formës, kanë vetëm një fitore, e plot katër humbje, njëjtë sikurse prizrenasit.
Këto dy ekipe, takimin e luajnë të shtunën në ora 19:00.
Sfida e fundit do të jetë mes Istogut e Vëllaznimit, dy ekipeve që kanë bilanc edhe pikë të njëjta.
Vetëm nga një fitore, e katër humbje është bilanci i tyre deri më tani.
Gjakovarët hyjnë të motivuar pas fitores së madhe ndaj Yllit vikendin e kaluar. Takimi mes tyre do të luhet të dielën nga ora 17:00.
