Java e gjashtë në Superligën e Kosovë nis sot, teksa vëmendja kryesore padyshim se do të jetë në "El Clasicon", mes Sigal Prishtinës dhe Pejës. Njëherit, kjo ndeshje e hap edhe këtë javë në elitë.
Përballja mes rivalëve të vjetër do të zhvillohet në Pallatin e Rinisë dhe të Sporteve, nga ora 16:00, dhe pritet të jetë mjaft interesante, shkruan Gazeta Express.
Të dy skuadrat po kalojnë formë të mirë, veçanërisht kampionia në fuqi e Kosovës, që ka pesë fitore nga po aq ndeshje, duke qenë kështu e vetmja skuadër pa humbje në elitë.
Vlen të theksohet se Peja udhëton drejt kryeqytetit pas fitores në FIBA Europe Cup të mërkurën, ndaj Heroes Den Bosch.
Në anën tjetër, Prishtina deri tash ka bilanc prej katër fitoreve dhe një humbjeje.
Ndeshja tjetër e kësaj të shtune do të zhvillohet në palestrën sportive "13 Qershori", mes Golden Eagle Yllit dhe Proton Cable Prizrenit, nga ora 19:00.
Skuadrat në fjalë nuk po kalojnë aspak formë të mirë, pasi kanë regjistruar vetëm nga një fitore, krahas katër humbjeve. /Gazeta Express/
