Gjykata Supreme i ka refuzuar si "të pabazuara" të gjashtë ankesat që shkuan atje, në lidhje me vendimet e Panelit Zgjedhor për Ankesa dhe Parashtresa, duke i hapur kështu rrugë certifikimit të rezultateve të zgjedhjeve parlamentare të 28 dhjetorit.

"Të gjitha ankesat janë refuzuar si të pabazuara", tha gjykata në një komunikatë për media.

Supremja e refuzoi ankesën e Partisë Rome të Bashkuar të Kosovës - e cila i konteston rezultatet e zgjedhjeve - me arsyetimin se "nuk qëndron pretendimi ankimor i ankuesit se votat janë në disproporcion të plotë me numrin real të banorëve në komunitetin rom, pasi me votat e votuesve të komuniteteve të tjera është siguruar përfaqësimi politik i komunitetit rom".

Supremja e ka refuzuar edhe ankesën e koalicionit PAI- PDAK-LPB, duke gjetur se edhe ajo "është e pabazuar". "Kjo për faktin se ankuesi, me asnjë provë të vetme nuk ka arritur të vërtetojë se ka pasur shkelje apo parregullsi, respektivisht manipulime të votave".

Janë refuzuar edhe disa ankesa e Emilija Rexhepit nga partia Nova Demokratska Stranka (NDS), po ashtu si "të pabazuara".

Supremja e ka refuzuar gjithashtu edhe ankesa të kandidatit për deputet nga PDK-ja, Bekim Haxhiu.