Bashkimi Europian tha se nuk ka "asgjë të re", në lidhje me një takim të mundshëm ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiq.

Shefja e diplomacisë së BE-së tha së fundmi se është e gatshme ta ndërmjetësojë “së shpejti” një takim të nivelit të lartë mes Kosovës dhe Serbisë, pasi Kurti u pajtua të shtunën t'i bëjë disa lëshime për strukturat ilegale serbe.

“Mund të konfirmojmë se nuk ka asgjë të re që mund t’ju ndajmë në këtë fazë. Përfaqësuesja e lartë ka përmendur përsëri në postimin e saj në rrjetet sociale në këtë fundjavë se është e gatshme të organizojë një takim të nivelit të lartë së shpejti”, tha BE-ja në një përgjigje për RTV21.

Pasi Kurti u pajtua të shtunën të mundësojë lehtësira të përkohshme për komunitetin serb në Ligjin për të huajt, Kallas tha se “është krijuar një momentum i ri për t’i çuar përpara marrëdhëniet mes BE-së dhe Kosovës dhe dialogun mes Prishtinës dhe Beogradit”.