Dy persona u vranë dhe një tjetër u plagos nga të shtënat me armë zjarri të enjten në mbrëmje në një konvikt të South Carolina State University, një universitet historikisht me shumicë studentësh afrikano-amerikanë, duke çuar në mbylljen e kampusit, njoftuan zyrtarët e shkollës në një deklaratë.
Të shtënat u raportuan rreth orës 21:15 sipas kohës lokale në një apartament në kompleksin rezidencial për studentë Hugine Suites, sipas deklaratës së publikuar në faqen e universitetit në Facebook.
S’kishte shumë informacion të dhënë, përfshirë nëse ndonjë nga autorët e sulmit ishte ende në arrati, shkruan Reuters, transmeton Gazeta Express.
“Zyrtarët e universitetit ende nuk kanë konfirmuar identitetet e viktimave apo gjendjen e personit të plagosur”, thuhej në deklaratë.
South Carolina State University, me mbi 3000 studentë të regjistruar, është një nga dy universitetet historikisht afrikano-amerikane në Orangeburg, Karolina e Jugut, një qytet universitar pranë lumit, rreth 40 milje në juglindje të kryeqytetit të shtetit, Columbia. Tjetri është Claflin University.
Një person që iu përgjigj telefonit në zyrën e sigurisë publike të universitetit të enjten në mbrëmje tha se nuk ishte i autorizuar të jepte informacion mbi incidentin.
