Në ambientet e Kosova Innovation Hub në Pejë, për herë të parë në Kosovë po organizohet Techathon – Teens in AI, në partneritet me Next Gen Networks, duke sjellë një format inovativ që vendos teknologjinë dhe kreativitetin në qendër të angazhimit të të rinjve.

Ky edicion ka mbledhur mbi 70 të rinj, të cilët do të punojnë në zhvillimin e ideve kreative dhe zgjidhjeve inovative duke shfrytëzuar teknologjitë më të reja, me fokus të veçantë në inteligjencën artificiale dhe transformimin digjital.

Gjatë gjithë kohëzgjatjes së hackathon-it, pjesëmarrësit do të mbështeten nga mentorë profesionistë të fushës së inovacionit dhe teknologjisë, si nga Kosova ashtu edhe nga jashtë vendit. Mentorët do të ofrojnë udhëzim praktik, këshilla profesionale dhe mbështetje në zhvillimin e projekteve, duke ndihmuar ekipet të strukturojnë idetë dhe t’i shndërrojnë ato në prototipe funksionale.

Për ekipet më të suksesshme janë paraparë shpërblime të veçanta, ndërsa organizatorët kanë paralajmëruar edhe befasi të tjera për pjesëmarrësit, me qëllim që kjo përvojë të jetë sa më motivuese dhe frymëzuese.

Organizimi i këtij aktiviteti konsiderohet një hap i rëndësishëm për forcimin e ekosistemit të inovacionit në Pejë dhe në nivel vendi, duke krijuar hapësirë për zhvillimin e talenteve të reja dhe promovimin e sipërmarrjes në fushën e teknologjisë.

Techathon – Teens in AI synon të fuqizojë gjeneratën e re, duke i ofruar mundësi konkrete për të mësuar, bashkëpunuar dhe krijuar zgjidhje që adresojnë sfida reale përmes teknologjisë.