Marc-André Ter Stegen ka pasur një sezon të vështirë, por pas largimit nga Barcelona drejt Gironës, gjërat kishin nisur të përmirësoheshin për portierin gjerman.

Megjithatë, shanset e tij për të qenë pjesë e Kupës së Botës 2026 tani janë vënë në dyshim.

Ter Stegen, i cili ishte informuar se nuk do të luante nëse do të qëndronte te Barcelona, vendosi të realizojë një huazim te Girona në fillim të afatit dimëror të transferimeve.

Ai ka qenë titullar në dy ndeshjet e fundit të katalanasve, por tani pritet të mungojë për një periudhë të konsiderueshme.

Pasi kishte munguar katër muaj më herët këtë sezon për shkak të një operacioni në shpinë, Ter Stegen ka pësuar tani një dëmtim në muskujt e kofshës.

Sipas “Cadena SER” (përmes “Marca”), ai do të jetë jashtë fushave deri në muajin prill.

Sipas raportimit, ekziston mundësia që Ter Stegen të rikthehet te Barcelona, nëse Girona vendos të afrojë një portier tjetër për ta zëvendësuar.

Nëse kjo ndodh, ai nuk do të aktivizohej edhe në rast se do të rikuperohej para përfundimit të sezonit, pasi Hansi Flick është i qartë se llogarit te Joan Garcia dhe Wojciech Szczęsny si portierët e tij.

Ter Stegen është i vetëdijshëm se duhet të luajë rregullisht për të siguruar një vend titullari me Gjermaninë në Kupën e Botës, por ky dëmtim do t’i reduktojë ndjeshëm minutat e lojës në muajt e ardhshëm.

Nëse ai mungon për dy muaj, kjo do të thotë gjithashtu se nuk do të jetë në gjendje të luajë për përfaqësuesen gjatë pushimit ndërkombëtar të marsit, çka përbën një tjetër goditje të madhe për të.

Mbetet të shihet se sa do të zgjasë mungesa e Ter Stegenit, por kjo do të jetë një goditje e hidhur si për të ashtu edhe për Gironën – ndonëse është lajm i mirë për Paulo Gazzanigan./GazetaExpress/