Kina dyshohet se ka kryer sulme të vazhdueshme hakerimi ndaj telefonave celularë të zyrtarëve të lartë të qeverisë britanike, duke kompromentuar komunikimet në nivelet më të larta të Downing Street, raportoi gazeta britanike The Telegraph.

Sipas raportimit, objektiva të këtyre sulmeve kanë qenë bashkëpunëtorë të ngushtë të ish-kryeministrave Boris Johnson, Liz Truss dhe Rishi Sunak.

Sulmet dyshohet se kanë nisur që në vitin 2021, por janë zbuluar vetëm në vitin 2024, pasi agjencitë amerikane të inteligjencës paralajmëruan se grupe hakerimi të lidhura me Pekinin kishin siguruar akses në infrastrukturën e kompanive të telekomunikacionit në mbarë botën. Operacioni, i njohur me emrin “Tajfuni i Kripës”, sipas burimeve amerikane, mbetet ende aktiv.

Kjo ngre shqetësime se edhe komunikimet e kryeministrit aktual Keir Starmer dhe rrethit të tij të ngushtë mund të jenë komprometuar.

Sipas burimeve, hakerët nuk kanë sulmuar drejtpërdrejt pajisjet individuale, por janë përqendruar në infrastrukturën e telekomunikacionit, duke fituar akses në thirrje telefonike, mesazhe, meta të dhëna dhe informacion mbi vendndodhjen e miliona përdoruesve, përfshirë zyrtarë të lartë qeveritarë.

Në nëntor, shërbimi britanik i inteligjencës MI5 paralajmëroi Parlamentin për një kërcënim serioz që vjen nga spiunazhi kinez. Raportimi vjen në një kohë kur pritet që kryeministri Keir Starmer të zhvillojë një vizitë në Kinë, e para nga një kryeministër britanik që prej vitit 2018, me synim forcimin e marrëdhënieve tregtare dhe të investimeve.

Ndërkohë, vendimi i qeverisë britanike për të miratuar ndërtimin e një kompleksi të madh të ambasadës kineze në Londër, pranë kabllove të ndjeshme të komunikimit, është kritikuar ashpër, duke u konsideruar nga kundërshtarët si një rrezik i shtuar për sigurinë kombëtare. Partia Laburiste është akuzuar se mban një qëndrim tepër të butë ndaj Pekinit.

Nga ana e saj, Ministria e Jashtme e Kinës ka mohuar akuzat, duke deklaruar se Pekini nuk mbështet sulme kibernetike dhe se vetë Kina është shpesh objektiv i aktiviteteve të tilla. Qeveria britanike, ndërkohë, ka refuzuar të komentojë më tej mbi akuzat për spiunazh.