Thiago Motta raportohet se është ndër kandidatët e mundshëm për të zëvendësuar Igor Tudor si trajner i Tottenham Hotspurit në Premierligë, më pak se një vit pasi italiani u zëvendësua nga kroati te Juventus.
Ka kaluar pothuajse një vit që kur Motta u shkarkua nga posti i trajnerit te Juventus.
Ish-trajneri i Bologna nuk arriti ta përfundonte sezonin me “Zonjën e Vjetër”, pavarësisht një vere me shumë shpenzime dhe një serie të gjatë rezultatesh jo bindëse më pas.
Motta u largua nga posti më 23 mars të vitit të kaluar dhe Tudor u emërua zëvendësues i tij në të njëjtën ditë.
Fillimisht, Tudor u emërua trajner i Juventusit me një kontratë afatshkurtër deri në fund të sezonit 2024-25, por më pas iu ofrua një zgjatje kontrate deri në verën e vitit 2028, pasi la përshtypje të mira me rezultatet në fund të sezonit.
Megjithatë, aventura e tij nuk zgjati shumë dhe në fund të tetorit ai u zëvendësua nga trajneri aktual Luciano Spalletti.
Tudor më pas u emërua trajner i Tottenham Hotspur, përsëri me një kontratë afatshkurtër deri në fund të sezonit.
Por fillimi i tij ka qenë shumë i vështirë, pasi Spurs kanë humbur tre ndeshjet e para nën drejtimin e tij dhe ndodhen vetëm një pikë mbi zonën e rënies nga kategoria me nëntë ndeshje të mbetura në kampionat.
Raportimet në Mbretërinë e Bashkuar tregojnë se Tottenham po mendon ta shkarkojë Tudorin vetëm pas tri ndeshjesh në krye të ekipit. Sipas mediave italiane, Motta është një nga kandidatët për ta zëvendësuar.
Sipas “Tuttosport” dhe “Calciomercato.com”, Tottenham po shqyrton dy trajnerë italianë: Thiago Motta dhe ish-trajnerin e Brighton & Hove Albion, Roberto De Zerbi.
Alternativa të tjera për këtë post përfshijnë edhe Sean Dyche, Robbie Keane dhe Ryan Mason./GazetaExpress/
