Një grup tifozësh të Chelseat ka organizuar një protestë kundër drejtimit aktual të klubit, pas largimit të trajnerit Enzo Maresca. Italiani u largua jo për arsye sportive, por për shkak të një përplasjeje të thellë me drejtuesit e klubit dhe mënyrën se si po menaxhohet projekti.

Që nga marrja e klubit nga konsorciumi BlueCo në vitin 2022, Chelsea ka ndjekur një strategji të fokusuar te afrimi i lojtarëve të rinj, duke ndryshuar shpesh trajnerët. Maresca u bë trajneri i katërt që largohet gjatë kësaj periudhe, pas Thomas Tuchel, Graham Potter dhe Mauricio Pochettino.

Grupi i tifozëve “Not A Project CFC” akuzon drejtuesit për mikromenaxhim, mungesë stabiliteti në skuadër dhe përqendrim më të madh te tregtia e lojtarëve sesa te suksesi i menjëhershëm sportiv. Si shenjë pakënaqësie, ata kanë planifikuar një protestë para ndeshjes ndaj Brentfordit më 17 janar.

Sipas tifozëve, pavarësisht shpenzimeve rekord në merkato, Chelsea nuk ka bërë përparim drejt fitimit të trofeve dhe po humbet identitetin si klub elitë. /GazetaExpress