Tifozët serbë u përplasën mes tyre gjatë ndeshjes kundër Anglisë të martën në mbrëmje.
Përçarjet thuhet se kishin motive politike, me shumë familje që larguan fëmijët nga trazirat.
Serbia ndodhet tashmë nën vëzhgimin e UEFA-s dhe FIFA-s pasi ka marrë mbi 600 mijë euro gjoba gjatë pesë viteve të fundit.
“Shqetësime po ndodhin në tribunën kryesore,” raportoi ITV.
“Familjet janë përfshirë dhe fëmijët duhej të largoheshin. Tifozët serbë po grindeshin mes tyre, një mosmarrëveshje politike.”
Paul Robinson e përshkroi situatën në BBC: “Ka disa trazira përreth stadiumit. Pamja nuk është aspak e bukur. Shumë familje kanë zgjedhur të largohen pasi gjërat po përshkallëzohen… Ka pasur një ndryshim në atmosferë. Të gjithë në stadium po shikojnë përreth për të parë se çfarë po ndodh.”
Më herët gjatë ndeshjes kishte shpërthyer një tjetër polemikë, pasi loja u ndërpre kur një lazer jeshil u drejtua drejt syrit të Ezri Konsas.
I njëjti lazer ishte vënë re më parë edhe te Reece James në momentin që po përgatitej të ekzekutonte një goditje dënimi. Pas incidentit, u bë një njoftim për tifozët vendas lidhur me përdorimin e lazerit.
Së paku 15 për qind e stadiumit “Rajko Mitic” në Beograd ishte mbyllur për tifozët vendas në këtë ndeshje, si dënim i FIFA-s për thirrje raciste në një ndeshje ndaj Andorrës.
Me gjoba që tashmë kalojnë shifrën e 600 mijë euro në pesë vitet e fundit, incidentet e së martës mund të sjellin pasoja edhe më të rënda për Serbinë./GazetaExpress/
