Merkatoja verore në Superligën e Kosovës ka sjellë lëvizje të rëndësishme, duke forcuar ndjeshëm skuadrat elitare të futbollit kosovar. Emisioni “Favorit”, me ekspertin e statistikave, Bleron Ajeti, ka prezantuar listën e 10 transferimeve më të bujshme, bazuar në vlerën e tregut sipas Transfermarkt.
Në krye të listës renditet portieri Adnan Golubovic, i cili iu bashkua kampionit aktual FC Ballkani, me një vlerë prej 550 mijë eurosh. Pas tij, qëndron mesfushori mbrojtës Kushtrim Shabani, që kaloi te Llapi (450 mijë €), ndërsa podiumin e plotëson sulmuesi maqedonas Mario Ilievski, tani pjesë e Prishtinës (400 mijë €).
Gjilani ka bërë goditjen e madhe me Besart Krivanjeva (350 mijë €), ndërsa Drita e ka përforcuar mesfushën me Vesel Limajn. Në listë janë edhe emra interesantë si venezueliani Ronaldo Chacon (KF Drenica) dhe Valmir Veliu, i cili pas eksperiencës jashtë vendit është rikthyer te Prishtina.
Në “Top 10” hyjnë gjithashtu Hamdi Namani e Djordje Saletic (të dy te Prishtina), si dhe talenti Jakup Berisha, që ka firmosur me Ferizajn.
