Como 1907 pësoi një humbje të papritur 2-1 në shtëpi nga Fiorentina, skuadër që para ndeshjes ndodhej në zonën e rënies. Golët e Nicolo Fagioli dhe Moise Kean i dhanë fitoren vizitorëve në Stadio Giuseppe Sinigaglia, pavarësisht autogolit të Fabiano Parisi.

Trajneri i klubit, Cesc Fabregas, nuk i kurseu kritikat ndaj sulmuesit Alvaro Morata dhe skuadrës së tij pas ndeshjes. Në një intervistë për DAZN, Fabregas shprehu zhgënjimin për mungesën e vetëdijes dhe energjisë nga lojtarët:

“Në pjesën e dytë nuk ishte një ndeshje futbolli. Duhet të tregojmë më shumë dëshirë dhe të jemi më të mirë në sulm nëse duam të luajmë lojën tonë. Ndihem keq që nuk arrita t’i transmetoj këtë tek lojtarët.”

Ai shtoi se kalendari i ngjeshur mund të jetë një mundësi për të reflektuar dhe rikuperuar:

“Pas 72 orësh do të luajmë në San Siro dhe më pas kundër Torinos. Kjo është një gjë e mirë për ta pritur pas kësaj ndeshjeje.”

Fabregas ishte edhe më i ashpër ndaj Moratës, i cili u përjashtua pas dy kartonëve të verdhë për përplasje me Rolando Mandragora dhe Marin Pongracic:

“Pres shumë më tepër nga një lojtar me përvojë si ai. Nuk mund të gjejmë justifikime dhe nuk mund të lejojmë që ajo që bëjnë të tjerët në fushë të ndikojë tek ne. Provokimi është pjesë e futbollit; ata që nuk mund të jetojnë me këtë duhet të luajnë një sport tjetër.” /GazetaExpress