Raportimet për interesimin e Gironës ndaj portierit të Barcelonës, Marc-André ter Stegen, janë ftohur pasi trajneri Michel Sanchez foli me vlerësime të larta për gjermanin.

33-vjeçari duket se dëshiron të qëndrojë te klubi katalanas, por po përballet me presion për t’u larguar, të paktën përkohësisht.

Ter Stegen është rikthyer në formë dhe ka luajtur në Kupën e Mbretit më herët këtë muaj, por pritet të mbetet zëvendës i Joan Garcia.

Drejtori sportiv i Gjermanisë, Rudi Völler, ka përsëritur mesazhin e Julian Nagelsmann se ter Stegen duhet të luajë rregullisht për të qenë portieri numër një në Kupën e Botës, ndërsa klubi katalanas është i interesuar të kursejë nga paga e tij e lartë.

Ndërkohë, Girona është në kërkim të një portieri.

Portieri kroat Dominik Livaković është në proces të ndërprerjes së huazimit për t’iu bashkuar Dinamo Zagrebit, ndërsa Paulo Gazzaniga ka bërë disa gabime këtë sezon.

“Sport” raporton se drejtori sportiv i Gironës, Quique Cárcel, ka kontaktuar Barcelonën për t’u interesuar si për disponueshmërinë e ter Stegenit ashtu edhe për gjendjen e tij fizike pas operacionit në shpinë.

Për shkak të kufizimeve të tavanit salarial, ata nuk do të ishin në gjendje të mbulonin të gjithë pagën e tij, por sipas “MD” janë të gatshëm të bëjnë përpjekje për ta sjellë veteranin.

Ata citojnë gjithashtu Michelin, i cili, i pyetur për interesimin e Gironës, tha: “Ai është një lojtar i nivelit të lartë, të gjithë do të donin të kishin një portier si ter Stegen.”

Pavarësisht interesimit dhe mundësisë për të humbur minuta loje në Kupën e Botës, raportohet se ter Stegen është kundër një transferimi te Girona.

Ai mbetet i vendosur të luftojë me Garcian për vendin e tij dhe nuk shqetësohet nga mundësia për të munguar në turneun që do të zhvillohet në SHBA, Kanada dhe Meksikë.

Një tjetër klub i lidhur me ter Stegenin, Aston Villa, raportohet se ka hequr dorë nga interesimi për një transferim – ndërsa ter Stegen duket i vendosur të qëndrojë në kryeqytetin katalanas për arsye familjare./GazetaExpress/