Chelsea ka shpenzuar shumë këtë verë, por një nga marrëveshjet e tyre mund të ketë ndikim financiar të madh në të ardhmen për shkak të një klauzole të veçantë në kontratë.

Blutë kanë investuar fuqishëm në afatin kalimtar veror, duke synuar rikthimin në garë për titullin e Premier League.

Sulmi është forcuar me afrimin e Liam Delap nga Ipswich, Joao Pedro nga Brighton dhe Jamie Gittens nga Borussia Dortmund.

Në mesfushë, është shtuar Dario Essugo, ndërsa prapavija është forcuar me Jorrel Hato. Chelsea vazhdon të lidhet me emrat e Alejandro Garnacho dhe Xavi Simons, ndërkohë që pritet të marrin edhe një qendërmbrojtës pas dëmtimit të rëndë (ACL) të Levi Colwill javën e kaluar.

Megjithatë, më shumë entuziazëm ka sjellë një lojtar që Chelsea nënshkroi me të që vitin e kaluar.

Në qershor 2024, Chelsea njoftoi se Willian Estevao do t’i bashkohej klubit në ditëlindjen e tij të 18-të të lindjes në 2025, për një shumë që mund të arrijë deri në 55 milionë paund. Tifozët e kanë ndjekur me vëmendje brazilianin, i cili ka shkëlqyer në Brasileirao para transferimit të tij në Londër.

Javën e kaluar, Estevao bëri paraqitjen e tij të parë me Chelsean dhe shënoi gol pas vetëm 18 minutash në një fitore miqësore ndaj Bayer Leverkusen.

Gittens i mahnitur nga Estevao

Blerja tjetër e verës, Jamie Gittens, e lavdëroi bashke lojtarin e ri pas ndeshjes ndaj gjermanëve:

“Ishte e mahnitshme. E patë Joga Bonito-n. Ai është një lojtar i madh me shumë aftësi dhe cilësi, kështu që ishte fantastike ta shohësh duke luajtur e shënuar. Ne e shohim këtë çdo ditë në stërvitje. Ka vetëm një javë këtu dhe ka bërë gjëra të pabesueshme. Ajo që pamë sot ishte vetëm një pjesë e asaj që bën çdo ditë.”

Rritja e shpejtë e famës së tij ka sjellë edhe diskutime të hershme mbi një nominim të mundshëm për Topin e Artë në të ardhmen — diçka që do të përfitonte ish-klubin e tij, Palmeiras.

Sipas Fabrizio Romano, Estevao ka një klauzolë “Ballon d’Or” në kontratën e tij, e cila i garanton Palmeiras një bonus nëse ai fiton çmimin si lojtar i Chelseat deri në vitin 2033.

Ndërkohë, ai është nominuar për trofeun prestigjioz Kopa Trophy, që u jepet lojtarëve më të mirë nën moshën 21 vjeç, të përzgjedhur nga fituesit e mëparshëm të Topit të Artë.

Edhe Cole Palmer dhe trajneri Enzo Maresca kanë marrë nominime individuale, me fituesit që do të shpallen më vonë këtë vit.

Yje të Premier League dhe klauzolat e tyre të “Ballon d’Or”

Estevao nuk është i pari që ka një klauzolë të tillë. Cristiano Ronaldo kishte një të ngjashme kur u rikthye te Manchester United në vitin 2021 — nëse ai do ta fitonte Topin e Artë, do të përfitonte një bonus prej 1 milion paundësh.

United gjithashtu i ka përdorur këto klauzola edhe me blerje të tjera. Anthony Martial, kur u transferua nga Monaco në vitin 2015, kishte një klauzolë që do t’i sillte klubit francez 7.2 milionë paund shtesë nëse fitonte çmimin, diçka që Monaco e konsideronte realiste pas fitimit të trofeut Golden Boy nga Martial.

Kapiteni aktual i United, Bruno Fernandes, kishte gjithashtu një klauzolë të ngjashme kur u bashkua nga Sporting në vitin 2020, megjithatë mungesa e një nominimi për vitin 2025 e bën të pamundur aktivizimin e saj së shpejti.

Në vitin 2020, Thiago Alcantara iu bashkua Liverpoolit me një marrëveshje që përfshinte 6 milionë euro bonuse të lidhura me performancën, një prej të cilave ishte fitimi i Topit të Artë.

Sulmuesi Mohamed Salah ka pasur një klauzolë disi të ndryshme: sipas “Don Balon” (via The Mirror), nëse nuk fitonte Topin e Artë me Liverpool, ai mund të kërkonte transferim te Real Madrid ose Barcelona. /GazetaExpress/