Të martën, Real Madrid përballet me Liverpool në Ligën e Kampionëve, dhe shumë sy do të jenë te Trent Alexander-Arnold.

Mbrojtësi i djathtë kaloi këtë verë nga “Anfield” në “Santiago Bernabéu”, pasi vendosi të mos rinovojë kontratën me kampionët aktualë të Premierligës.

Pritet që Trent të përjetojë një “mirëseardhje” armiqësore kur ai dhe shokët e skuadrës së Real Madridit mbërrijnë në “Anfield” për këtë përballje të fazës së ligës.

Para ndeshjes, ai foli për “Prime Video” (përmes MD) për pritjen dhe për sfidën ndaj ish-klubit të tij:

“E dija që një ditë do të përballem me Liverpoolin. Ata janë një skuadër e madhe, kështu që e imagjinoja që një ditë do të kthehesha këtu. Është një përzierje emocionesh; mendoj se do të jetë një ndeshje shumë e vështirë, por jam shumë i entuziazmuar. Gjithçka do të ndihet ndryshe: ngrohja në anën tjetër, të qenit në dhomën e zhveshjes së mysafirëve… Por kjo bën pjesë të lojës. Kam folur me Andy Robertson dhe Mohamed Salah kur dolën ndeshjet. Edhe pse nuk po kalojnë rezultate të mira kohët e fundit, ata mbeten një skuadër e madhe dhe askush këtu nuk mendon se do të jetë një lojë e lehtë”, tha ai.

Trent pranoi gjithashtu se në rast se do të shënonte kundër klubit të fëmijërisë së tij, ai nuk do të festonte golin:

“Mënyra se si do të më pranojnë varet nga tifozët… Unë gjithmonë e kam dashur klubin dhe do të jem gjithmonë tifoz i Liverpool-it. Nëse shënoj një gol, nuk do ta festoj”, shtoi ai.

Megjithatë, nuk është e sigurt nëse Trent do të luajë fare në këtë ndeshje.

Trajneri i Real Madrid, Xabi Alonso, vendosi të mos e aktivizojë gjatë fitores së skuadrës ndaj Valencias gjatë fundjavës, dhe duke qenë se nuk ka luajtur asnjë minutë gati dy muaj, mund të mos rrezikohet të aktivizohet në një përballje me intensitet të lartë si kjo ndaj Liverpoolit./GazetaExpress/