Pas dy humbjeve radhazi, skuadra e Trepçës është rikthyer te fitorja në Superligën e Kosovës në basketboll.
Në ndeshjen e vlefshme për javën e 27-të, Trepça fitoi në udhëtim kundër Golden Eagle Yllit, shkruan Gazeta Express.
Ndeshja e zhvilluar sot në palestrën sportive “13 Qershori” përfundoi me rezultatin 85:91.
Erjon Kastrati me 18 pikë dhe Drilon Hajrizi me 15 sosh, ishin dy basketbollistët më të dalluar në fitoren e mitrovicasve.
Te suharekasit u dallua Henrik Sirko me 23 pikë.
Trepça pas kësaj fitore ka 43 pikë dhe vazhdon të jetë e katërta në tabelë, me bilanc prej 16 fitoreve dhe 11 humbjeve.
Ylli tani është i dyti me 46 pikë, vetëm një më shumë se Peja, që sonte do ta zhvillojë ndeshjen e kësaj jave, kundër Bashkimit.
Trepça në xhiron e ardhshme e pret Vëllaznimin, kurse Ylli i shkon Bashkimit. /Gazeta Express/
