Sonte do të zhvillohet ndeshja e dytë finale e “play-offit” të Superligës së basketbollit në mes të Trepçës dhe Golden Eagle Yllit.
Duelin e parë final e kishin fituar therandasit me rezultat të ngushtë, 63:62, me tre pikëshin në fund nga Henrik Sirko.
Therandasit do ta kërkojnë sonte ngritjen e serisë së ndeshjeve finale në 2-0, kurse “Xehetarët” duan ta barazojnë serinë në 1-1, shkruan “Gazeta Express”.
Në garat e rregullta, ekipet u përballën katër herë, duke shënuar nga dy fitore ndaj njëra-tjetrës, që tregon për rivalitetin e madh që e kanë pasur në këtë edicion.
Këto dy skuadra kishin përfunduar garat e rregullta, në pozitën e parë, përkatësisht të dytë.
Golden Eagle në gjysmëfinale të “play-offit” e kishte mundur Sigal Prishtinën 3:0 me ndeshje, kurse ‘Xehetarët’ e eliminuan Pejën me seri prej 3:1.
Ylli e synon mbrojtjen e titullit, që do të ishte i dyti në histori të klubit, kurse mitrovicasit shpresojnë ta fitojnë titullin pas një dekade.
Ndeshja e sontme do të luhet në palestrën “Minatori” në Mitrovicë duke filluar nga ora 20:30.
Siç dihet, ekipi që i shënon tri fitore shpallet kampion i Kosovës. /Gazeta Express/
