Skuadra e Trepçës ka siguruar kualifikimin në finalen e Superligës së Kosovës në basketboll, pasi mposhti Sigal Prishtinën me rezultat 84:80 në ndeshjen e katërt të serisë gjysmëfinale, duke e mbyllur atë me rezultat të përgjithshëm 3:1.

Në një përballje tejet të fortë dhe të tensionuar, mitrovicasit e nisën fuqishëm takimin në Pallatin e Rinisë dhe Sporteve, duke fituar çerekun e parë me 29:18. Prishtina reagoi në çerekun e dytë, të cilin e fitoi me 27:19, duke e ngushtuar diferencën në pushim.

Çereku i tretë u karakterizua nga mbrojtje të forta dhe pak pikë, me Trepçën që arriti ta ruajë epërsinë me një rezultat të ngushtë 10:9, ndërsa në çerekun e fundit të dy skuadrat shënuan nga 26 pikë, por epërsia e krijuar në pjesën e parë i dha Trepçës fitoren vendimtare.

Me këtë triumf, Trepça konfirmon formën e mirë dhe synimet serioze për titullin kampion, ndërsa pret tashmë kundërshtarin e saj në finale.

Për Prishtinën, sezoni mbyllet në fazën gjysmëfinale, pas një serie të luftuar që tregoi rivalitetin e madh ndërmjet dy klubeve më të njohura të basketbollit kosovar.