Real Madrid ka zyrtarizuar këtë javë largimin e Lucas Vázquez, duke i dhënë fund një lidhjeje 17-vjeçare me klubin. Me mbërritjen e Trent Alexander-Arnold, trajneri dhe drejtuesit e klubit kanë vendosur se është koha që veterani spanjoll të nisë një kapitull të ri në karrierën e tij.

Në ceremoninë e lamtumirës, Lucas dha fjalën e fundit përpara se të përqendrohet te zgjedhja e klubit të ardhshëm. Edhe pse largimi i tij ishte i njohur prej javësh, nuk pritet një vendim i menjëhershëm për të ardhmen e tij – duke i lënë kohë klubeve të interesuara të paraqesin ofertat e tyre.

Sipas Mundo Deportivo, dy gjigantë të Serie A – Juventus dhe Milan – kanë shfaqur interes për të. Të dy skuadrat janë në kërkim të një mbrojtësi të djathtë me eksperiencë, dhe Lucas shihet si një opsion ideal. Nëse kalon te Milani, ai do të ribashkohej me mikun dhe ish-shokun e skuadrës Luka Modric, i cili gjithashtu u largua nga Real Madrid këtë javë dhe firmosi me kuqezinjtë.

Ndërkohë, sipas Diario AS, interesim ka ardhur edhe nga Besiktas. Klubi turk sapo ka humbur shërbimet e Kyle Walker-Peters, i cili u bashkua me West Ham, dhe kërkon të reagojë shpejt duke siguruar një alternativë cilësore në krahun e djathtë të mbrojtjes.

Megjithëse sezoni 2024-25 nuk ishte më i miri për Lucasin, ai sërish tregoi vlerat e tij në ndeshje të rëndësishme dhe ruajti respektin nga trajneri dhe tifozët. Kjo ka bërë që profile të rëndësishme në futbollin evropian ta kenë në vëzhgim.

Një vendim për të ardhmen nuk është urgjent, pasi 34-vjeçari dëshiron të kalojë disa javë pushimi me familjen pas një sezoni të lodhshëm dhe emocionalisht të ngarkuar. Por është e sigurt se emri i tij do të mbetet në qendër të merkatos në javët në vijim./GazetaExpress/