Ish-trajneri i Marseille, Roberto De Zerbi, raportohet se po konsiderohet nga dy klube të Premier League, përveç Tottenhamit, pas shkarkimit të Thomas Frank.
De Zerbi ka përvojë të mëparshme në Premierligë, duke drejtuar Brighton nga 2022 deri në 2024 para se të merrte drejtimin e skuadrës së Ligue 1, Marseille.
46-vjeçari la një përshtypje të fortë në brigjet jugore të Anglisë, duke udhëhequr “Seagulls” në përfundimin më të mirë të historisë së tyre në elitën angleze, me vendin e gjashtë në sezonin 2022/23 dhe më pas vendin e 11-të vitin pasardhës.
Edhe pse e çoi Marseille në vendin e dytë në 2024/25, sezoni aktual ka qenë i vështirë për De Zerbin, me ekipin aktualisht në vendin e katërt në Ligue 1, 12 pikë prapa liderit Paris Saint-Germain pas 21 ndeshjesh.
Të dielën më 8 shkurt, Marseille pësoi një humbje të thellë 5-0 ndaj PSG-së, dhe De Zerbi la detyrën me “marrëveshje të përbashkët” të mërkurën më 11 shkurt.
“Pas konsultimeve me të gjithë aktorët e udhëheqjes së klubit – pronarin, presidentin, drejtorin sportiv dhe trajnerin kryesor – u vendos të bëhet një ndryshim në drejtimin e ekipit të parë,” njoftoi klubi.
“Kjo ishte një vendim kolektiv dhe i vështirë, i marrë pas shqyrtimi të kujdesshëm, në interes të klubit dhe për të adresuar sfidat sportive të fund-sezonit.”
Megjithatë, vetëm pak orë pas largimit nga Marseille, italiani lidhet menjëherë me një rikthim në Premierligë, me thashetheme të nxitura nga shkarkimi i Thomas Frank te Spurs.
Sipas gazetarit Ben Jacobs, “De Zerbi është i interesuar për rikthim në Premierligë” dhe mbetet “kandidat” për poste të mundshme te Manchester United dhe Manchester City, nëse këto role lëshohen në verën e vitit 2026.
Ka pasur spekulime për të ardhmen e trajnerit të City, Pep Guardiola, ndërsa trajneri aktual i United, Michael Carrick, ka kontratë vetëm deri në fund të sezonit 2025/26.
Në një intervistë për “TNT Sports” në janar, De Zerbi sugjeroi se kishte gjëra të papërfunduara në Premierligë.
Ai pranoi: “Ndjej se puna ime në qytet [Marseille] nuk ka përfunduar. Në të ardhmen, padyshim, Premierligë është ndryshe nga çdo ligë tjetër në botë, por momentalisht fokusi im është vetëm te Marseille. Premierliga është absolutisht liga më e mirë në botë dhe kam kujtime të shkëlqyera nga koha ime te Brighton. Ishte një eksperiencë e jashtëzakonshme për mua.”/GazetaExpress/
