Presidenti Donald Trump tha se ka “pika të mëdha dakordësie” me Iranin pasi bisedimet vazhduan deri vonë në mbrëmjen e së dielës me dy të dërguar të lartë amerikanë, raporton CNN.

“Do të shohim ku do të çojnë”, u tha Trump gazetarëve në aeroportin në West Palm Beach, ku ai kaloi fundjavën.

“Ato shkuan, do të thosha, në mënyrë perfekte”, shtoi ai më vonë, duke shtuar se Irani i nisi bisedimet. “Do të thosha se nëse ato vazhdojnë në atë mënyrë, kjo do t’i japë fund atij problemi, atij konflikti, dhe mendoj se do t’i japë fund në mënyrë shumë, shumë të konsiderueshme”.

Trump tha se të dërguarit e tij Steve Witkoff dhe Jared Kushner janë të përfshirë në diskutime, por ai ishte relativisht i paqartë se me kë po fliste SHBA-ja në Iran, përveç se specifikoi se bëhej fjalë për një udhëheqës “të respektuar” që nuk është Udhëheqësi Suprem Mojtaba Khamenei.

“Ata duan shumë të bëjnë marrëveshje. Edhe ne do të donim të bënim marrëveshje”, tha Trump, duke shtuar se do të ketë telefonata të tjera të hënën, të ndjekura nga një takim ballë për ballë “shumë, shumë shpejt”.

“Po bëjmë një periudhë pesëditore, do të shohim si do të shkojë. Nëse shkon mirë, do të përfundojmë duke e zgjidhur këtë. Përndryshe, ne thjesht vazhdojmë të bombardojmë me gjithë fuqinë tonë”, tha Trump.

Ai tha se çdo marrëveshje do të kërkonte që Irani të mos sigurojë një bombë bërthamore - “Duam të mos ketë bombë bërthamore, as armë bërthamore”, tha ai - por gjithashtu që SHBA-ja të marrë në zotërim uraniumin e pasuruar në nivel të lartë të Iranit.

“Pluhurin bërthamor. Ne do ta duam atë. Dhe mendoj se do ta marrim. Kemi rënë dakord për këtë”, tha ai.