Donald Trump njoftoi se do të kërkojë 1 miliard dollarë (730 milionë paund) dëmshpërblim nga Universiteti i Harvardit, në kuadër të përplasjes së vazhdueshme të administratës së tij me institucionin.

Lajmi vjen pasi New York Times raportoi se administrata e presidentit amerikan ishte detyruar të tërhiqej nga kërkesa për një pagesë prej 200 milionë dollarësh gjatë negociatave me universitetin, raporton BBC.

Trump iu referua artikullit në një postim në Truth Social vonë të hënën, duke fajësuar Harvardin se po “ushqen shumë budallallëqe” për New York Times.

Zyrtarët e Trump kanë akuzuar Harvardin se nuk ka bërë mjaftueshëm për të luftuar antisemitizmin gjatë protestave pro-palestineze. Harvard i ka hedhur poshtë këto akuza.

Harvardi ka qenë një objektiv kryesor në fushatën e Shtëpisë së Bardhë për të shuar atë që e quan ideologji “woke” dhe të “së majtës radikale” në kampuset amerikane.

Në prill të vitit të kaluar, Trump anuloi rreth 2 miliardë dollarë grante kërkimore për Harvardin dhe ngriu financimin federal.

Universiteti paditi administratën Trump për këtë veprim, duke deklaruar se asnjë qeveri “nuk duhet të diktojë se çfarë mund të mësojnë universitetet private, kë mund të pranojnë dhe punësojnë, dhe cilat fusha studimi dhe kërkimi mund të ndjekin”.

Një gjykatë federale amerikane më vonë i anuloi shkurtimeve prej miliardash në financim, duke vendosur se qeveria kishte shkelur të drejtat e universitetit për lirinë e shprehjes.

Shtëpia e Bardhë u zotua se do ta kundërshtonte menjëherë “vendimin e rëndë”, duke thënë se Harvardi mbetet “i papërshtatshëm për grante në të ardhmen”.

Para njoftimit të së hënës, qeveria kishte qenë në diskutime me Harvardin për një marrëveshje të mundshme për të zhbllokuar financimin federal.

“Tani po kërkojmë Një Miliard Dollarë dëmshpërblim dhe nuk duam të kemi më asgjë të bëjmë, në të ardhmen, me Universitetin e Harvardit,” shkroi Trump të hënën.

Ai e akuzoi Harvardin për “paligjshmëri serioze dhe të neveritshme”, por nuk sqaroi se si besonte se universiteti kishte shkelur ligjin.

Trump ka kërcënuar më parë se do t’i heqë Harvardit statusin e përjashtimit nga taksat dhe se do të marrë kontrollin e patentave të universitetit që burojnë nga kërkime të financuara nga fondet federale.

Tre universitete të tjera të Ivy League — Columbia, Penn dhe Brown — arritën marrëveshje me Trump për të ruajtur financimin që ishte në rrezik për shkak të pretendimeve të ngjashme nga administrata, në vend që ta çonin çështjen në gjykatë.