Presidenti i SHBA-së, Donald Trump, ka ndryshuar qëndrimin e tij në lidhje me luftën kundër Iran, duke deklaruar se operacionet e SHBA-së dhe Izraelit janë “shumë më përpara se sa parashikimi fillestar”.

Në një intervistë telefonike për CBS News, Trump tha se beson se lufta është thuajse e përfunduar. Ai shtoi: “Ata nuk kanë flotë, nuk kanë komunikime, nuk kanë forcë ajrore. Raketat e tyre janë shkatërruar, dronët shpërthejnë kudo, edhe në fabrikat ku prodhohen.”

Trump theksoi gjithashtu se nuk u ka mbetur asgjë nga perspektiva ushtarake.

Në lidhje me Mojtaba Khamenei, që zëvendëson të atin si udhëheqës suprem i Iranit, ai tha: “Nuk kam asnjë mesazh për të. Absolutisht asnjë”, duke shtuar se ka dikë tjetër në mendje për të udhëhequr vendin.

Sa i përket navigacionit në Ngushticën e Hormuzit, Trump deklaroi se SHBA mund të ndërmarrë veprime të shumta dhe kërcënoi Iranin nëse pengon lundrimin.

“Ata hodhën gjithë municionin që kishin dhe më mirë të mos përpiqen të bëjnë ndonjë veprim ‘të mençur’, përndryshe do të jetë fundi i këtij vendi… Nëse bëjnë diçka të keqe, do të jetë fundi i Iranit dhe nuk do të dëgjoni më kurrë emrin e tij”, tha ai, ka transmetuar Panorama.

Presidenti gjithashtu tha se Ngushtica e Hormuzit është tani e hapur dhe pretendoi se anije kanë hyrë në zonë, edhe pse shtoi se ende “po mendon për ta kontrolluar”.

Ai shprehu optimizëm për kohëzgjatjen e luftës, ndryshe nga parashikimi i tij fillestar që konflikti mund të zgjasë rreth një muaj. “Jemi shumë përpara planit,” tha Trump për CBS News, duke theksuar se lufta “thuajse ka përfunduar”.

Në të njëjtën kohë, Ministria e Luftës amerikane publikoi në platformën X se “sapo filluam të luftojmë dhe se nuk do të tregojmë mëshirë”.