Presidenti i SHBA-së Donald Trump tha të shtunën se nuk është i interesuar të negociojë me Iranin dhe ngriti mundësinë që lufta me Iranin të përfundojë vetëm pasi ai vend të mos ketë më ushtri funksionale ose ndonjë udhëheqje të mbetur në pushtet, raporton Reuters.
Duke folur me gazetarët në bordin e Air Force One, Trump tha se fushata ajrore mund t’i bëjë negociatat të parëndësishme nëse të gjithë udhëheqësit e mundshëm të Iranit vriten dhe ushtria iraniane shkatërrohet.
“Në një moment, nuk mendoj se do të mbetet më askush ndoshta për të thënë ‘Dorëzohemi’” tha Trump.
Izraeli dhe Irani shkëmbyen sulme të shumta të shtunën ndërsa lufta në Lindjen e Mesme hyri në javën e dytë. Presidenti i Iranit kërkoi falje ndaj shteteve fqinje për ta qetësuar zemërimin në gjithë Gjirin, por nxiti kritika nga linjat e ashpra brenda vendit.
“Unë personalisht u kërkoj falje vendeve fqinje që u prekën nga veprimet e Iranit”. tha Presidenti iranian Masoud Pezeshkian, duke u bërë thirrje atyre të mos i bashkohen sulmeve SHBA-Izrael ndaj Iranit.
Ai e hodhi poshtë kërkesën e Trump për dorëzim të pakushtëzuar të Republikës Islamike si “ëndërr”, por tha se këshilli i përkohshëm i udhëheqjes ka rënë dakord t'i pezullojë sulmet ndaj shteteve fqinje, përveç rasteve kur sulmet ndaj Iranit do të vinin nga territori i tyre.
Megjithatë, Trump e paraqiti kërkimfaljen e Iranit si dorëzim dhe paralajmëroi se SHBA mund t'i zgjerojë sulmet e saj.
Mes ndarjeve të mundshme brenda udhëheqjes iraniane për komentet e Pezeshkian, Kryeministri izraelit Benjamin Netanyahu, në një fjalim të transmetuar në televizion, tha se çdo anëtar i Gardës Revolucionare iraniane që do t'i dorëzonte armët nuk do të dëmtohej.
Ali Ardashir Larijani, sekretar i Këshillit Suprem të Sigurisë Kombëtare të Iranit, tha në televizionin shtetëror se nuk ka përçarje mes zyrtarëve iranianë lidhur me mënyrën se si po trajtohet lufta.
Arabia Saudite i ka thënë Teheranit se, ndonëse favorizon një zgjidhje diplomatike, sulmet e vazhdueshme iraniane ndaj mbretërisë dhe sektorit të saj të energjisë mund ta shtyjnë Riadin të përgjigjet në të njëjtën mënyrë, u thanë Reuters-it katër burime të njohura me çështjen.
