Presidenti amerikan, Donald Trump tha se ishte “shumë e rrezikshme” që Mbretëria e Bashkuar të bashkëpunojë me Kinën, ndërsa kryeministri Sir Keir Starmer vazhdonte vizitën e tij në Pekin për të rivendosur marrëdhëniet.
Presidenti amerikan reagoi ndaj marrëveshjeve që synojnë rritjen e biznesit dhe investimeve midis MB-së dhe Kinës, të shpallura pasi Keir u takua me presidentin kinez Xi Jinping, si pjesë e një udhëtimi treditor.
“Epo, është shumë e rrezikshme që ata ta bëjnë këtë,” tha Trump në premierën e një dokumentari për bashkëshorten e tij Melania, kur u pyet se çfarë mendonte për rritjen e lidhjeve të biznesit të Britanisë me Kinën.
Në përgjigje të komenteve të Trump, Downing Street bëri të ditur se Washingtoni kishte qenë i informuar paraprakisht për këtë udhëtim dhe objektivat e tij.
Trump nuk shtoi asgjë më tej për angazhimin e MB-së me Kinën, duke u zhvendosur në vend të kësaj te Kanadaja dhe duke dhënë një paralajmërim të ngjashëm.
Ai tha se ishte “edhe më e rrezikshme, mendoj, për Kanadanë”.
“Kanadaja nuk po ecën mirë. Po ecën shumë keq dhe nuk mund ta shikosh Kinën si përgjigjen,” shtoi ai.
Trump më herët këtë javë kërcënoi se do të vendoste tarifa ndaj Kanadasë nëse ajo do të vazhdonte me marrëveshjet ekonomike të arritura me Kinën gjatë një vizite të fundit në Pekin nga kryeministri i saj, Mark Carney.
Komentet vijnë pasi Sir Keir tha se marrëdhënia e MB-së me Kinën ishte në një “gjendje të mirë dhe të fortë” pas bisedimeve të tij me Xi në Sallën e Madhe të Popullit të enjten.
