Presidenti i SHBA-së, Donald Trump, po zemërohet gjithnjë e më shumë që aleatët nuk po e ndihmojnë në operacionin në Ngushticën e Hormuzit. Trumpi tani kaloi në kërcënime.

Presidenti i SHBA-së, Donald Trump, shprehu sërish zemërimin e tij ndaj vendeve aleate që nuk po marrin pjesë në operacionin në Ngushticën e Hormuzit. "Sigurojeni vetë naftën tuaj!”, shkroi Trump në platformën e tij Truth Social.

Presidenti amerikan bëri një propozim: "të gjitha vendet që nuk kanë më karburant për shkak të situatës në ngushticën e Hormuzit, si për shembull Britania e Madhe, që ka refuzuar të marrë pjesë në shkatërrimin e ushtrisë në Iran, duhet të blejnë naftë nga SHBA, pasi ne kemi me bollëk”.

Ai shtoi se SHBA nuk do të ndihmojë më vendetqë varen nga furnizimet me naftë përmes ngushticës së Hormuzit. "Duhet të mësoni të mbroheni vetë; SHBA nuk do të jetë më për ju, ashtu siç ju nuk ishit për ne”, shkroi Trump.

Trump gjithashtu akuzoi Francën se ka refuzuar të lejojë që të fluturojnë mbi territorin e saj avionë që transportonin pajisje ushtarake drejt Izraelit. "SHBA-ja nuk do ta harrojë këtë!”, paralajmëroi Trumpi.

Reagime nga partnerët

Pallati Élysée Palace u shpreh "i habitur” dhe theksoi se Franca nuk e ka ndryshuar qëndrimin e saj. Sipas gazetës "Le Monde", e cila u referohet burimeve zyrtare, për avionët luftarakë dhe avionët që transportojnë pajisje ushtarake kërkohet aktualisht një leje e veçantë për çdo fluturim në Francë, e njohur si "diplomatic overflight clearance”. Kjo do të thotë se është e mundur që disa avionë të mos e kenë marrë menjëherë lejen, gjë që mund të ketë çuar në reagimin e Donald Trump.

Edhe Italia ka refuzuar t'u lejonte disa avionëve ushtarakë amerikanë që ishin nisur për operacione kundër Iranit që të uleshin në një bazë në Siçili. Kurse qëndrimi i Spanjës ishte edhe më i ashpër. Spanja e mbylli hapësirën e saj ajrore për të gjithë avionët që kanë lidhje me luftën kundër Iranit dhe duke theksuar se nuk do të mbështesë operacione të tilla.

Mosmarrëveshje me SHBA-në lidhur me përdorimin e bazave ajrore, ka edhe Britania e Madhe, sepse qeveria britanike hezitoi që të përfshihej drejtpërdrejt në konflikt. /DW