Një përplasje e re ka lindur mes presidentit amerikan Donald Trump dhe Federatës Ndërkombëtare të Futbollit (FIFA), pasi organizata ndërkombëtare e futbollit duket se ka mbështetur komentet e Trumpit për mundësinë e zhvendosjes së disa ndeshjeve të Kupës së Botës 2026 nga disa qytete pritëse në SHBA.

Në një raport të publikuar të dielën, FIFA lëshoi një deklaratë që dukej se konfirmonte pretendimin e Trumpit se qeveritë lokale, dhe jo FIFA, janë përfundimisht përgjegjëse për sigurinë dhe mbrojtjen gjatë ndeshjeve të Botërorit.

Deklarata erdhi pas kërcënimit të Trumpit se do të tërhiqte ndeshjet nga qytetet që ai i konsideron “të pasigurta”.

Në një aktivitet të fundit, Trump shënjestroi Bostonin, kryeqytetin e Massachusetts, duke thënë se do t’i kërkojë presidentit të FIFA-s, Gianni Infantino, që të zhvendosë ndeshjet nëse kushtet lokale nuk përputhen me pritshmëritë e tij.

“Nëse dikush po bën një punë të keqe, dhe nëse mendoj se ka kushte të pasigurta, do ta telefonoj Giannin, kreun e FIFA-s, që është fenomenal, dhe do t’i them ‘le ta zhvendosim diku tjetër’. Ai nuk do ta donte, por do ta bënte. Do ta bënte shumë lehtë. Dhe tani është koha e duhur për ta bërë këtë,” – deklaroi Trump.

Deklarata bëri bujë të madhe kombëtare dhe shkaktoi reagime të ashpra, pasi të gjitha qytetet pritëse të Kupës së Botës 2026 janë zgjedhur dhe kanë nënshkruar kontrata të detyrueshme ligjërisht.

Megjithatë, ajo që befasoi më shumë fansat nuk ishte vetë deklarata e Trumpit, por reagimi i FIFA-s.

Pas komenteve të tij, FIFA publikoi një deklaratë që ritheksoi se masat e sigurisë dhe mbrojtjes janë përgjegjësi e qeverive, jo e ekzekutivit të organizatës.

Ky qëndrim duket se bie ndesh me deklaratat e mëparshme të nënkryetarit të FIFA-s, Victor Montagliani, i cili kishte thënë se vetëm FIFA ka kompetencën për të ndryshuar qytetet pritëse pasi ato janë shpallur zyrtarisht.

Ky ndryshim qëndrimi ka shkaktuar konfuzion brenda organizatës dhe ka lënë përshtypjen se FIFA po mban anën e Trumpit, duke kundërshtuar një nga drejtuesit e saj më të lartë.

Kryetarja e Bashkisë së Bostonit, Michelle Wu, reagoi menjëherë, duke i quajtur komentet e Trumpit “teatër politik”.

Ajo sqaroi se marrëveshja e qytetit për të pritur ndeshje të Kupës së Botës është ligjërisht detyruese dhe se çdo përpjekje për ta përjashtuar Bostonin nga turneu do të përballej me padi të menjëhershme.

“Shumica e gjërave janë të mbyllura me kontratë, kështu që asnjë person i vetëm – madje edhe nëse jeton aktualisht në Shtëpinë e Bardhë – nuk mund ta zhbëjë këtë. Jetojmë në një botë ku për dramë, kontroll dhe shtrirje të pushtetit, lëshohen vazhdimisht kërcënime ndaj atyre që refuzojnë të përkulen apo t’i binden një agjende urrejtjeje,” – tha Wu.

Bostoni është një nga 11 qytetet amerikane që do të presin ndeshje të Botërorit 2026, i cili do të zhvillohet bashkërisht në SHBA, Meksikë dhe Kanada.
Në fakt, as Trump dhe as ndonjë president amerikan nuk kanë juridiksion për të ndryshuar listën e qyteteve pritëse të FIFA-s, pasi këto janë përzgjedhur pas një procesi shumëvjeçar dhe janë të mbrojtura nga marrëveshje të ndërlikuara ligjore midis FIFA-s dhe komiteteve lokale të organizimit.

Ekspertët e së drejtës sportive paralajmërojnë se çdo përpjekje për të zhvendosur ndeshje për arsye politike do të përfundonte me procese gjyqësore, do të dëmtonte sponsorët dhe do të krijonte kaos logjistik, pasi përgatitjet për turneun janë tashmë në fazën përfundimtare.

Për FIFA-n, kjo krizë nënvizon vështirësinë për të balancuar diplomacinë politike me imazhin e saj të paanshëm.

Duke u dukur sikur mbështet versionin e Trumpit, organizata rrezikon të humbasë besimin e zyrtarëve të saj dhe të zemërojë qytetet pritëse, të cilat kanë investuar miliona për të organizuar ndeshjet.

Ndërsa situata vazhdon të zhvillohet, si organizatorët amerikanë ashtu edhe drejtuesit e FIFA-s përpiqen të ruajnë qetësinë, por komentet e fundit të Trumpit garantojnë se rruga drejt Kupës së Botës 2026 do të jetë larg paqes dhe polemikave./GazetaExpress/