Projekt i ri hekurudhor shkurton distancën mes Cyrihut dhe Winterthurit

Aktualisht, trenat që qarkullojnë mes Cyrihut dhe Winterthurit janë të detyruar të ndjekin një rrugë më të gjatë, pasi kodrat mes Bassersdorfit dhe Winterthurit pengojnë ndërtimin e një linje të drejtpërdrejtë, përcjell albinfo.ch.

Kjo situatë pritet të ndryshojë me ndërtimin e një tuneli të ri hekurudhor. Hekurudhat Federale Zvicerane (SBB) planifikojnë të nisin ndërtimin e Tunelit të Brüttenit në vitin 2026, ndërsa përfundimi i tij parashikohet në vitin 2034.

Tuneli me dy tuba, me gjatësi rreth 9 kilometra, do ta shkurtojë kohën e udhëtimit mes Cyrihut dhe Winterthurit nga 20 në vetëm 12 minuta.

Me një kosto prej 3.3 miliardë frangash zvicerane, ky projekt renditet si i treti më i shtrenjtë në historinë e SBB-së, pas tuneleve të Lötschbergut dhe Gotthardit. /Albinfo.ch