Turqia njoftoi të martën se një sistem amerikan i mbrojtjes ajrore Patriot është vendosur në juglindje të vendit, pranë bazës së radarëve të NATO-s në Kurecik, në kuadër të forcimit të mbrojtjes ajrore të aleancës përballë kërcënimeve me raketa që lidhen me luftën me Iranin.

Sipas Ministrisë turke të Mbrojtjes, sistemi po vendoset në provincën Malatya, ku ndodhet baza e radarëve të NATO-s në Kurecik, e cila ofron të dhëna të rëndësishme për aleancën. Radarët e kësaj baze ndihmuan gjithashtu në identifikimin e dy raketave balistike iraniane që gjatë javës së kaluar u drejtuan drejt territorit turk.

Irani ka deklaruar se nuk është në luftë me vendet e rajonit dhe ka mohuar se ka shënjestruar drejtpërdrejt Turqinë. Megjithatë, Ankaraja e ka paralajmëruar Teheranin që të mos lëshojë më raketa në drejtim të saj, ndërsa presidentët e dy vendeve e diskutuan këtë çështje të hënën.

“Në kuadër të masave që po marrim në nivel kombëtar, janë rritur edhe masat e mbrojtjes ajrore dhe raketore nga NATO. Në këtë kontekst, një sistem Patriot po vendoset në Malatya për të kontribuar në mbrojtjen e hapësirës sonë ajrore”, thuhet në deklaratën e ministrisë turke.

Autoritetet turke shtuan se do të vazhdojnë të monitorojnë zhvillimet në rajon dhe të bashkëpunojnë me aleatët e NATO-s.