Pas një periudhe larg ringut dhe shumë spekulimesh rreth të ardhmes së tij, Tyson Fury ka vendosur të rikthehet në boks.

Ish-kampioni i botës në peshën e rëndë do të zhvillojë ndeshjen e radhës më 11 prill, kur do të përballet me boksierin rus Arslanbek Makhmudov, një emër i njohur për fuqinë e jashtëzakonshme të goditjeve.

Lajmi është konfirmuar nga mediat ndërkombëtare, duke i dhënë fund zërave për një pensionim të përhershëm të Furyt, përcjell “Gazeta Express”.

“Gypsy King” rikthehet kështu në skenën e madhe të boksit me synimin për të rifituar vëmendjen dhe për të dëshmuar se ende ka çfarë të ofrojë në kategorinë më të fortë të sportit.

Kundërshtari i tij, Arslanbek Makhmudov, vjen me reputacionin e një nokautuesi të rrezikshëm.

Boksieri rus ka ndërtuar karrierën mbi forcën brutale dhe stilin agresiv, duke u konsideruar një test serioz për çdo rival.

Për Furyn, kjo ndeshje nuk është thjesht rikthim, por një provë e menjëhershme në nivel të lartë.

Përballja pritet të zhvillohet në Mbretërinë e Bashkuar dhe tashmë ka ngjallur interes të madh te tifozët e boksit, të cilët janë kuriozë të shohin se në çfarë gjendje do të paraqitet Fury pas pauzës dhe sa i gatshëm është ai për duele të mëdha në të ardhmen.

Me këtë rikthim, Tyson Fury hap një kapitull të ri në karrierën e tij, ndërsa ndeshja kundër Makhmudov pritet të jetë një nga eventet më tërheqëse të vitit në boksin profesionist. /Gazeta Express