Kampionen e Kosovës, Dritën po e ndajnë më pak se dy ditë deri te ndeshja me Celjen në “Fadil Vokrri”.
Drita do të përballet me Celjen, në kuadër të fazës së “play-offit” të Ligës së Konferencës.
Bardhekaltërit nga Gjilani përfunduan në vendin e 21-të në fazën e ligës me tetë pikë të tubuara pas gjashtë ndeshjeve, duke u bërë skuadra e parë kosovare që kalon në fazën e eliminimit direkt në një kompeticion të madh evropian.
Me këtë shkak, shtëpia e futbollit evropian, UEFA e ka publikuar një artikull kushtuar Dritës, me titull “FC Drita: Kosovarët që po bëjnë historinë”.
Ky është artikulli i plotë:
“Të jem plotësisht i sinqertë, nuk menduam kurrë se do të marrim tetë pikë pas katër ndeshjeve të para – as unë, as lojtarët.”
Duke u bërë klubi i dytë kosovar që arrin fazën e ligës ose grupet e një kompeticioni të madh UEFA, trajneri i FC Dritës, Zekirija Ramadani, e kishte të qartë sfidën që e priste ekipin e tij para sezonit të Ligës së Konferencës.
Por një rrugëtim mbresëlënës me dy barazime dhe dy fitore u dha atyre vend në ‘play-off’ – dhe me këtë, një vend në librat e rekordeve si klubi i parë nga Kosova që kalon në fazën e nokautit në një kompeticion klubesh të meshkujve të UEFA-s.
Pavarësisht pritshmërive, nuk kishte sugjerim që Drita do të ndiente presionin e historisë.
“Mund të flas edhe për pronarët tanë – as ata nuk e prisnin këtë. Por ne punuam pa pushim,” shtoi Ramadani. “Jam i bindur se suksesi nuk vjen thjesht kështu; ai duhet të meritohet, dhe jam i bindur që ne e merituam këtë sukses.”
“Kualifikimi për Europën është shumë, shumë i rëndësishëm për ne si komb – jo vetëm si klub,” tha Faton Maloku.
Ndërmjet Dritës dhe rundit të 16 më të mirave janë sllovenët e Celjes. Para ndeshjes së parë, e cila do të luhet më 19 shkurt, besimi se mund të vazhdojnë rrugëtimin e tyre historik është i lartë:
“Ne kemi cilësinë dhe vullnetin për të kaluar play-off-in,” tha kapiteni Rron Broja, i cili është frymëzuar nga mundësia për të konkurruar në arenën evropiane.
“Të jesh pjesë e Ligës së Konferencës ka shumë rëndësi, për ekipin dhe për tifozët e Dritës,” shtoi Broja. “Për një futbollist të lindur dhe rritur në Kosovë, ka qenë gjithmonë ëndërr të jesh pjesë e një turneu evropian dhe mendoj se kjo është një nga arritjet e mia më të mëdha.”
Arritja e rundit të 16-të të Ligës së Konferencës do të përfaqësonte një pikë kthese jo vetëm për klubin, por për të gjithë futbollin kosovar.
Pavarësisht rezultatit kundër Celjes, ka shumë për të festuar në suksesin e Dritës.
“Ne kemi bërë gjithë Kosovën krenare, dhe është një përgjegjësi e madhe të mbash këtë fanellë,” pranon Broja.
Portieri Faton Maloku pajtohet: “Kualifikimi për Europën është shumë, shumë i rëndësishëm për ne si komb – jo vetëm si klub,” tha ai.
“Ne kemi një histori të thellë, që ka përfshirë kohë shumë të vështira. Gjithçka kjo është si një shpërblim për sakrificat e njerëzve që kanë kaluar ato ngjarje”, e mbylli ai./Gazeta Express/
