UEFA ka njoftuar se ka shtyrë vlerësimin për çështjen që përfshin Crystal Palace dhe Lyon, ndërsa ka konfirmuar se një klub tjetër është përjashtuar nga garat evropiane për shkak të shkeljes së rregullave mbi pronësinë e shumëfishtë të klubeve.

Crystal Palace ndodhet në rrezik për një shkelje të mundshme të këtyre rregullave, pasi aksionari i tyre kryesor, John Textor, ka gjithashtu kontrollin mbi Lyon – klub që së fundmi është rënë në Ligue 2 në Francë.

Të dy klubet janë kualifikuar për edicionin e ardhshëm të Ligës së Europës, por Palace argumenton se Textor nuk ka ndikim real në vendimmarrje, pasi zotëron vetëm 25% të fuqisë së votës.

Megjithatë, rregulloret e UEFA-s përcaktojnë se çdo palë që ka të paktën 30% të fuqisë së votës ka “ndikim vendimtar” mbi një klub.

Të hënën, UEFA e shtyu vendimin për pjesëmarrjen e Palace në Ligën e Europës, duke sqaruar më tej situatën përmes një deklarate zyrtare:

“Kjo shtyrje lidhet me përputhshmërinë e Olympique Lyonnais me marrëveshjen e nënshkruar me Dhomën e Parë të Kontrollit Financiar të Klubeve (CFCB), për shkeljen e kritereve të qëndrueshmërisë financiare. Sipas marrëveshjes, Lyon ka pranuar përjashtimin nga garat evropiane për sezonin 2025/26 nëse autoritetet franceze (DNCG) konfirmojnë rënien e klubit në Ligue 2.”

UEFA shtoi se më shumë detaje për këtë rast të pronësisë së shumëfishtë dhe për marrëveshjen e arritur do të publikohen në vijim.

Ndërkohë, UEFA ka konfirmuar gjithashtu se klubi sllovak FC DAC 1904 Dunajská Streda është përjashtuar nga Liga e Konferencës për sezonin e ardhshëm për të njëjtën arsye.

Pronari i klubit, Oszkár Világi, ka gjithashtu në pronësi klubin hungarez FC ETO Győr, i cili po ashtu është kualifikuar në të njëjtën garë.

Sipas një deklarate të UEFA-s, e publikuar nga media sllovake “ŠPORT.sk”, thuhet:
“Bazuar në vlerësimin e dokumentacionit të dorëzuar nga klubet, Dhoma e Parë e Kontrollit Financiar të Klubeve ka konkluduar se FC ETO Győr dhe FC DAC 1904 Dunajská Streda kanë shkelur rregullin për pronësinë e shumëfishtë të përcaktuar në nenin 5.01 të Rregullores së UEFA-s për garat e klubeve në datën përkatëse 1 mars 2025.”

Si rezultat, kundërshtari i planifikuar i DAC 1904 – fituesi i ndeshjes mes Urartu (Armeni) dhe Neman Grodno (Bjellorusi) – ka kaluar automatikisht në raundin tjetër preliminar.

Gjithashtu, më herët këtë muaj u konfirmua përjashtimi nga Europa edhe i klubit irlandez Drogheda United, pasi humbi një apel në Gjykatën e Arbitrazhit për Sportin (CAS).

Drogheda, që kishte siguruar kualifikimin në Ligën e Konferencës, nuk do të lejohet të marrë pjesë në garë pasi është në pronësi të Trivela Group, e cila zotëron gjithashtu shumicën e aksioneve të klubit danez Silkeborg IF.

Të dy klubet kishin siguruar pjesëmarrjen në Evropë përmes fitimit të kupave kombëtare përkatëse, por vetëm Silkeborg do të jetë pjesëmarrës, pasi përfundoi sezonin në vendin e shtatë në Superligën daneze, ndërsa Drogheda e përfundoi kampionatin në vendin e nëntë nga dhjetë skuadra në Irlandë./GazetaExpress/