Manchester United është nxitur të shqyrtojë seriozisht transferimin e mesfushorit të Newcastle United, Sandro Tonali, si zëvendësues afatgjatë i Casemiros, i cili pritet të largohet në fund të këtij sezoni.

Italiani 25-vjeçar ka qenë një nga pikat kyçe të mesfushës së Newcastle që nga transferimi i tij nga AC Milan dhe ka tërhequr interesim të madh në Premier League.

Arsenal raportohet se e kishte në listë Tonalin gjatë ditës së fundit të merkatos së janarit, për të mbuluar mungesën e Mikel Merinos, por pa zhvilluar bisedime konkrete.

Interesimi i “Topçinjve” për mesfushorin italian konsiderohet afatgjatë dhe mund të rikthehet gjatë afatit kalimtar veror. Përveç Arsenalit, edhe Chelsea dhe Manchester City janë lidhur me një lëvizje të mundshme për Tonalin, i cili ka kontratë me Newcastle deri në vitin 2029 dhe vlerësohet rreth 100 milionë paund.

Ish-mbrojtësi i Manchester United, Danny Simpson, ka theksuar se “Djajtë e Kuq” duhet të përfshihen në çdo garë për shërbimet e italianit, duke e parë atë si profil ideal për mesfushën e skuadrës.

“Tonali do të përshtatej për mrekulli në mesfushën e United. Ai lëviz shumë, është i fortë fizikisht, shumë i mirë me topin dhe do ta plotësonte shkëlqyeshëm Kobbie Mainoo. Është lojtar që mund ta përballojë presionin e fanellës së Manchester United,” është shprehur Simpson.

Pas një merkatoje të qetë në janar, Manchester United pritet të fokusohet në përforcime të mëdha gjatë verës, me mesfushën që mbetet një nga prioritetet kryesore të klubit. /GazetaExpress