Manchester United e ka vendosur syrin te Felix Nmecha si një nga përforcimet e mundshme kyçe për mesfushën në sezonin e ardhshëm. Klubi anglez ka shprehur interes të veçantë për mesfushorin e Borussia Dortmund, i cili pati një sezon të shkëlqyer në Gjermani dhe është bërë një lojtar i rëndësishëm për skuadrën verdhezi.
Megjithëse në Signal Iduna Park nuk mendohet për largimin e tij, “Djajtë e Kuq” mund të këmbëngulin me një ofertë që gjermanëve mund t’iu jetë e vështirë ta refuzojnë.
Nmecha, 23 vjeç, e përfundoi sezonin me 39 paraqitje në të gjitha garat, duke kontribuar me 6 gola dhe 3 asistime. Profili i tij ka tërhequr vëmendjen e disa klubeve nga Premier League, falë përshtatshmërisë së lartë, përvojës ndërkombëtare dhe aftësive gjuhësore, që e ndihmojnë të integrohet menjëherë. Po ashtu, e kaluara e tij në akademinë e Manchester City-t e bën një lojtar që njeh mirë qytetin dhe ambientin konkurrues në Angli.
Megjithatë, Borussia Dortmund ka mbajtur një qëndrim të fortë dhe nuk dëshiron të humbasë një tjetër mesfushor. Klubi gjerman tashmë ka përjetuar largime të rëndësishme drejt Premier League në vitet e fundit, si Erling Haaland apo Manuel Akanji, dhe nuk dëshiron të përsërisë të njëjtën situatë me një tjetër lojtar kyç.
Me një vlerë tregu prej rreth 28 milionë euro, interesi i United mund të ushtrojë presion mbi një operacion që, për momentin, është larg përfundimit. Por merkatoja sapo ka nisur – dhe gjithçka mund të ndryshojë.
