Barcelona ka punuar me një skuadër relativisht të shkurtër në sezonet e fundit, por një nga pozicionet ku nuk i mungon thellësia është ai i “numrit 10”.

Disa lojtarë mund të luajnë në atë rol, por Dani Olmo dhe Fermin Lopez kanë qenë kryesisht në konkurrencë për minuta gjatë dy sezoneve të fundit.

Olmo erdhi si një transferim i madh në vitin 2024, por Lopez ka performuar më mirë përgjatë kësaj periudhe dhe ka fituar besimin e trajnerit Hansi Flick si titullar.

Mesfushori spanjoll kishte interes nga Anglia verën e kaluar, por refuzoi një kalim te Chelsea dhe së fundmi rinovoi kontratën deri në vitin 2031.

Megjithatë, kjo nuk ka ndalur interesimin nga jashtë.

Sipas “El Chiringuito”, Manchester Unitedi është i gatshëm të shpenzojë deri në 100 milionë euro për Lopez këtë verë.

Pavarësisht kësaj, raportohet se as lojtari dhe as Barcelona nuk janë të interesuar për një lëvizje të tillë në këtë moment dhe nuk do ta mirëprisnin një ofertë.

Nga ana tjetër, vera pritet të jetë më e ngarkuar për Barcelonën, pasi klubi besohet se do të rikthehet brenda kufijve të pagave për herë të parë pas katër vitesh.

Kjo do t’i japë më shumë fleksibilitet drejtorit sportiv Deco në merkato, sidomos nëse realizohen shitje.

Si shembull, Barcelona duket e hapur të dëgjojë oferta për lojtarë si Jules Kounde dhe Alejandro Balde, që kanë qenë titullarë të rregullt në tre vitet e fundit.

Ndërkohë, Lopez ka fituar vendin e tij në formacionin startues dhe, për momentin, duket më e mundshme që klubi ta mbajë. Kjo situatë mund të krijojë pikëpyetje për të ardhmen e Dani Olmo./GazetaExpress/