Manchester United raportohet se është i interesuar të hapë bisedime për të nënshkruar një mesfushor, ish-lojtar i Manchester Cityt, i cili më parë ka luajtur nën drejtimin e Pep Guardiolës.
Që nga momenti kur Michael Carrick pasoi Ruben Amorimin si trajner i Manchester United në janar, “Djajtë e Kuq” kanë përmirësuar formën, me anglezin që ka udhëhequr ekipin drejt tre fitoreve dhe një barazimi në katër ndeshje.
Përforcimet e verës Matheus Cunha, Senne Lammens dhe Bryan Mbeumo kanë pasur ndikim pozitiv në skuadër, ndërsa Benjamin Sesko ende po përshtatet me Premierligën, pavarësisht kontributeve të rëndësishme së fundmi, duke shënuar golin e fitores në minutat e fundit kundër Fulham dhe një barazim dramatik ndaj West Ham United.
E ardhmja e Carrick mbetet e paqartë, pasi trajneri ka kontratë me United deri në verën e vitit 2026.
20 herë kampioni i Premierligës aktualisht renditet i katërti në elitën angleze, pozicion që do t’i siguronte pjesëmarrjen në Ligën e Kampionëve nëse e ruan deri në fund të sezonit.
Pjesëmarrja në Ligën e Kampionëve 2026/27 pritet ta bëjë United një destinacion tërheqës për lojtarët që kërkojnë transferim këtë verë.
Sipas “TeamTalk”, United është në kërkim të një zëvendësuesi për Casemiron, i cili tashmë ka konfirmuar se do të largohet në verë pas përfundimit të kontratës.
Disa mesfushorë të Premierligës, përfshirë Elliot Anderson, Carlos Baleba dhe Adam Wharton, janë lidhur me një kalim në “Old Trafford”, ndërsa raportohet se United do të hapë bisedime edhe me përfaqësuesit e mesfushorit të Borussia Dortmund, Felix Nmecha, ish-lojtar i Manchester Cityt.
Nmecha, 25 vjeç, u rrit te Manchester City nga viti 2007 deri më 2019 dhe bëri tri paraqitje me ekipin e parë para se të transferohej te Wolfsburg në vitin 2021.
Thuhet se Guardiola nuk i ofroi kontratë të re pasi nuk e konsideronte mjaftueshëm të mirë.
Që atëherë, reprezentuesi gjerman ka bërë paraqitje mbresëlënëse dhe në vitin 2023 u transferua te Dortmund.
Me klubin gjerman ka regjistruar 13 gola dhe tetë asistime në 103 ndeshje dhe ndihmoi ekipin të arrijë finalen e Ligës së Kampionëve në sezonin 2023/24.
Nmecha ka kontratë me Dortmund deri në qershor 2028 dhe vlerësohet rreth 52 milionë paund, ndërsa United përballet me konkurrencë nga Tottenham dhe Chelsea./GazetaExpress/
