Manchester United kanë shfaqur interes për zëvendësuesin e Marcus Rashford vetëm disa orë pasi u mësua se sulmuesi, që nuk është më në planet e klubit, ka gjetur ekip të ri.

Rashford, 27 vjeç, është huazuar te Aston Villa për gjysmën e dytë të sezonit 2024/25, pasi ka humbur vendin në formacionin e trajnerit Ruben Amorim. Fillimisht nuk ishte e qartë nëse marrëdhënia mes tyre mund të rregullohej pas rikthimit të Rashford te United, por bazuar në zërat që vijnë nga klubi dhe mungesa e tij në listën e 29 lojtarëve për miqësoren ndaj Leeds United në Suedi, duket se ndarja është përfundimtare.

Gjithashtu të shtunën, gazetari i njohur David Ornstein raportoi se Barcelona po avancon në përpjekjet për të marrë Rashford në huazim, me një opsion blerjeje të përfshirë në marrëveshje. Drejtori sportiv i Barcelonës, Deco, kishte pranuar në maj se Rashford dhe Luis Diaz i pëlqejnë, duke i cilësuar si emra që mund të përmirësojnë skuadrën.

Rashford vetë, gjatë një interviste në YouTube në qershor, lavdëroi talentin 18-vjeçar të Barcelonës, Lamine Yamal, duke thënë: “Do të jetë patjetër atje në të ardhmen. Është e vështirë të përshkruash çfarë po bën ai në këtë moshë. Nuk mendoj se kemi parë ndonjëherë diçka të tillë.” Kur u pyet nëse do donte të luante me Yamal, Rashford tha: “Sigurisht që do të doja. Të gjithë në botë duan të luajnë me më të mirët. Shpresoj... do të shohim.”

Vetëm pak orë pasi doli lajmi për huazimin e Rashford te Barcelona, u përhapën raportime edhe për zëvendësuesin e tij të mundshëm. Sipas Footmercato, si Newcastle ashtu edhe Manchester United janë të interesuar për sulmuesin e Paris Saint-Germain, Randal Kolo Muani, i cili e kaloi gjysmën e dytë të sezonit në huazim te Juventusi.

Gjatë qëndrimit në Torino, sulmuesi francez realizoi 10 gola dhe dha 3 asistime në 22 paraqitje, duke lënë përshtypje të mira. Kolo Muani, 26 vjeç, është nën kontratë me PSG deri në qershor 2028, por do ta ketë të vështirë të sigurojë një vend titullari pas sezonit të suksesshëm të klubit, ku u dalluan emra si Desiré Doué, Barcola, Dembélé dhe Kvaratskhelia.

Sulmuesi u transferua te PSG në vitin 2023 për 76.4 milionë paund, por nuk ka arritur të përmbushë pritshmëritë. Sipas Transfermarkt, vlera aktuale e tij në treg është rreth 30 milionë euro (rreth 26.1 milionë paund)./GazetaExpress/