Ushqimet ultra të përpunuara (UPF) kanë më shumë të përbashkëta me cigaret sesa me frutat ose perimet dhe kërkojnë rregullim shumë më të rreptë, sipas një raporti të ri.

UPF-të dhe cigaret janë të projektuara për të nxitur varësinë dhe konsumin, thanë studiues nga tre universitete amerikane, duke vënë në dukje paralelizmat në dëmet e gjera shëndetësore që i lidhin të dyja.

UPF-të, të cilat janë gjerësisht të disponueshme në të gjithë botën, janë produkte ushqimore që janë prodhuar industrialisht, shpesh duke përdorur emulsifikues ose ngjyrues dhe aroma artificiale. Kategoria përfshin pije të buta dhe ushqime të paketuara si patate të skuqura dhe biskota, shkruan The Guardian, transmeton Gazeta Express.

Sipas një punimi të studiuesve nga Harvardi, Universiteti i Miçiganit dhe Universiteti Duke, ekzistojnë ngjashmëri në proceset e prodhimit të UPF-ve dhe cigareve, si dhe në përpjekjet e prodhuesve për të optimizuar ‘dozat’ e produkteve dhe shpejtësinë me të cilën ato reagojnë në rrugët biologjike të ndjesisë së kënaqësisë.

Ata mbështeten në të dhëna nga fushat e shkencës së varësisë, të ushqyerit dhe historisë së shëndetit publik për të bërë krahasimet e tyre, të botuara më 3 shkurt në revistën e kujdesit shëndetësor Milbank Quarterly.

Autorët sugjerojnë se pretendimet e marketingut mbi produkte, si p.sh. ‘me pak yndyrë’ ose ‘pa sheqer’, përbëjnë një “health ëashing” - paraqitje e rreme si e shëndetshme - që mund të pengojë rregullimin, ngjashëm me reklamimin e filtrave të cigareve në vitet 1950 si risi mbrojtëse që ‘në praktikë ofronin pak ose aspak përfitim real’.

“Shumë UPF-të ndajnë më shumë karakteristika me cigaret sesa me frutat ose perimet e përpunuara minimalisht dhe për këtë arsye kërkojnë rregullim në përputhje me rreziqet e rëndësishme për shëndetin publik që ato paraqesin”, përfunduan ata.

Një nga autoret, Prof. Ashley Gearhardt e Universitetit të Miçiganit, një psikologe klinike e specializuar në varësi, tha se pacientët e saj bënin të njëjtat lidhje: “Ata thoshin: ‘Ndihem e varur nga kjo gjë, e dëshiroj – dikur pija cigare [dhe] tani kam të njëjtin zakon, por është me pije të gazuara dhe petulla. E di që po më vret; dua ta lë, por nuk mundem’”.

Debati rreth UPF-ve përputhet me një model të përdorur mirë në fushën e varësisë, sipas Gearhardt. Ajo tha: “Ne thjesht ia hedhim fajin individit për një kohë dhe themi ‘oh, e dini, thjesht pini duhan me masë, pini me masë’ – dhe përfundimisht arrijmë në një pikë ku kuptojmë levat që industria mund të përdorë për të krijuar produkte që mund t’i tërheqin vërtet njerëzit”.