“Jam e dukshme, por nuk ndjej se më kanë parë vërtet”

Airyn De Niro, vajza e aktorit të famshëm Robert De Niro dhe aktores Toukie Smith, ka dalë publikisht si transgjinore në një intervistë të fundit për revistën Them.

29-vjeçarja ka ndarë për herë të parë rrugëtimin e saj personal, sfidat gjatë rritjes dhe përpjekjet për të ndërtuar një identitet të shëndetshëm në një botë plot paragjykime.

“Jam e dukshme, por nuk ndjej se më kanë parë vërtet”, shprehet Airyn në intervistën ku flet hapur për përvojat e saj me dismorfizmin trupor dhe presionin për të përmbushur standardet e bukurisë.

“Gjithmonë më thonin që isha shumë e madhe, jo mjaftueshëm e hollë, shumë femërore, jo mjaftueshëm mashkullore. Kurrë nuk më kanë thënë ‘je mirë kështu siç je’”, ka thënë 29-vjeçarja.

Airyn, e cila ka nisur terapinë hormonale në nëntor të vitit 2024, thotë se është frymëzuar nga nëna e saj dhe nga gratë me ngjyrë që kanë thyer barriera në shoqëri. Ajo synon të jetë një zë për vajzat transgjinore me ngjyrë dhe për ata që nuk përputhen me imazhin tipik të “heroina chic” apo trupave super të hollë.

“Do të doja të frymëzoja qoftë edhe një person si unë, që është me ngjyrë, që është queer,” shprehet ajo.

Në lidhje me pretendimet se është një “nepo baby” (fëmijë i famshëm me privilegje në industri), Airyn thekson se nuk është rritur në botën e famës:

“Babai im na mbështeti për të gjetur rrugën tonë. Nuk u rrita duke marrë role në filmat e tij apo duke shkuar në premiera. Ata u përpoqën të më jepnin një fëmijëri sa më normale”.

Pavarësisht sfidave, Airyn shfaqet sot më e fortë, më e ndërgjegjshme për veten dhe e gatshme të ndihmojë të tjerët që po kalojnë të njëjtin udhëtim.