Ish-portieri i Juventusit dhe Manchester United, Edwin van der Sar, ka zbuluar se në fund të viteve ’90 kishte mundësi të transferohej te Liverpool, por vendosi të zgjidhte Juventusin: “Zemra më shtyu drejt Italisë.”
Në një intervistë të gjatë për La Gazzetta dello Sport, holandezi foli për periudhën e tij te Ajax nën drejtimin e Louis van Gaal, kalimin te Juventusi dhe përvojat e mëvonshme me Sir Alex Ferguson dhe Cristiano Ronaldon te Manchester United.
Van der Sar qëndroi dy vite në Torino me “Zonjën e Vjetër” nga viti 1999 deri në 2001, periudhë në të cilën ai vetë ka pranuar se nuk e dha lojën e tij më të mirë. Megjithatë, karriera e tij mund të kishte marrë një drejtim krejt tjetër, pasi ai zbuloi se kishte një ofertë edhe nga Liverpool.
Pse zgjodhi Juventusin dhe jo Liverpoolin
“Kisha dy opsione: Liverpool ose Juventus,” tha Van der Sar për La Gazzetta dello Sport.
“Bisedova me të dy klubet, por zemra më shtyu drejt Italisë. Serie A ishte kampionati më i fortë në atë kohë, Juventusi ishte një klub historik dhe na kishte mposhtur në finalen e Champions League në vitin 1996.
Më pëlqente fanella bardhezi dhe isha i intriguar nga ideja për të luajtur për një skuadër ku një legjendë si Dino Zoff kishte shkëlqyer.”
Holandezi pranon se nuk arriti nivelin e tij më të lartë te Juventusi, gjë që çoi në shitjen e tij te Fulham pas dy sezonesh në Serie A.
“Te Juventusi kishte shumë ndryshime krahasuar me zakonet që kisha te Ajax,” shpjegoi ish-drejtuesi i Ajax-it.
“Nuk luajta futbollin tim më të mirë, por nuk e kam aspak keqardhje. Kur një sulmues nuk shënon, ose një portier nuk pret gola, është pjesë e lojës të marrësh kritika. Megjithatë, ishte një përvojë fantastike të jetoja dhe të luaja në Itali.
Verën kur mbërrita, shokët e skuadrës më nxorën disa herë për darkë: Ferrara, Iuliano, Zidane, Inzaghi, Zambrotta, Davids. Hanin shumë mirë në restorantet e Torinos. Në fund të darkave, unë doja të paguaja me kartë, por nuk më lanë kurrë të paguaja asgjë.” /GazetaExpress/
