Presidenti i La Ligës, Javier Tebas, ka rindezur polemikat me Real Madridin.
Gjatë prezantimit të albumit të ri të ngjitësave të Paninit, ai u pyet për raportin që klubi madrilen planifikon t’ia dërgojë FIFA-s për të denoncuar atë që e konsideron si gabime sistematike të arbitrimit.
Tebas ishte kategorik: “Nëse raporti i krahason vetëm Real Madridin me Barcelonën, është i njëanshëm. Ne kemi të dhëna që nga viti 2005 për penalltitë, kartonët e kuq, gjithçka. Duhet pasur shumë kujdes me atë që thuhet, sepse dëmton garën”.
Presidenti i La Ligës nuk u përmbajt dhe vuri në shënjestër drejtpërdrejt linjën editoriale të Real Madrid TV, duke e akuzuar kanalin e klubit se po ushqen një narrativë të rrezikshme.
“Jemi në një epokë tregimesh shumë të rrezikshme. Nuk mund të krijojmë idenë se arbitrimi është i njëanshëm,” deklaroi ai.
Sa i përket kartonit të kuq të diskutueshëm ndaj Dean Huijsen kundër Real Sociedadit, Tebas theksoi se zgjidhja qëndron tek përmirësimi i përdorimit të teknologjisë: “Preferoj modelin e Primera RFEF, ku trajnerët kanë dy rishikime për ndeshje. Nëse kjo do të zbatohej në futbollin profesionist, do të zhdukej shumë polemikë.”
Ndërkohë, seanca stërvitore e Real Madridit në Valdebebas u vonua për shkak të një testi surprizë antidoping në prag të debutimit në Champions League kundër Marseille, gjë që shkaktoi pakënaqësi në skuadër.
Tebas mohoi kategorikisht çdo përfshirje të La Ligës: “Ne kurrë nuk kemi ditur kur do të kryhen testet, dhe as nuk kemi autoritet për këtë. Duket sikur për gjithçka fajësohet LaLiga, por nuk është kështu”.
Ai gjithashtu u bëri thirrje mediave që të verifikojnë informacionet para publikimit: “Informacionet e gabuara krijojnë zhurmë të panevojshme. Rekomandoj që çdo gjë të verifikohet, edhe nëse vjen nga Real Madridi”.
Deklaratat e Tebasit ndezin sërish “luftën e ftohtë” mes presidentit të LaLigës dhe Florentino Pérezit.
Me nisjen e Champions League, atmosfera rreth klubit madrilen është tensionuar edhe më shumë. Ajo që është e qartë është se përplasjet mes dy institucioneve do të vazhdojnë dhe pritet të sjellin kapituj të rinj në javët e ardhshme.
