Alexander Butterfield, ish-ndihmësi i presidentit amerikan Richard Nixon, i njohur për zbulimin e sistemit sekret të regjistrimit të bisedave në Shtëpinë e Bardhë që çoi në dorëheqjen e Nixon-it gjatë skandalit Watergate, ka vdekur në moshën 99-vjeçare.
Vdekja e tij u konfirmua për Associated Press nga bashkëshortja e tij, Kim, dhe John Dean, ish-këshilltar i Nixon-it në Shtëpinë e Bardhë gjatë skandalit Watergate, i cili së bashku me Butterfield ndihmoi në ekspozimin e abuzimeve.
Dean tha: “Ai kishte përgjegjësinë e rëndë për të zbuluar diçka që ishte betuar ta mbante sekret, instalimin e sistemit të regjistrimit të Nixon-it. Ai u ngrit dhe tha të vërtetën.”
Si zëvendës-nëndihmës i presidentit, Butterfield mbikëqyrte sistemin e regjistrimit të lidhur me pajisjet e aktivizuara me zë që ishin vendosur fshehurazi në katër lokacione, duke përfshirë zyrën e Nixon-it në Ndërtesën e Zyrave Ekzekutive dhe vendpushimin presidencial në Camp David.
Ky zbulim tronditi opinionin publik dhe u bë prova kryesore që ekspozoi rolin e Nixon-it në fshehjen e vjedhjes së selisë së Partisë Demokratike në ndërtesën Watergate në vitin 1972.
Ai më vonë tha se, përveç tij dhe presidentit, vetëm shefi i stafit H.R. Haldeman, një ndihmës i tij dhe disa agjentë të Shërbimit Sekret e dinin për sistemin.
Për të shmangur shkarkimin nga Kongresi, Nixon dha dorëheqjen më 9 gusht 1974, më pak se një muaj pasi Gjykata e Lartë urdhëroi dorëzimin e regjistrimeve.
Butterfield besonte se kishte ndikuar në fatin e presidentit. “Nuk më pëlqente të isha shkaku i kësaj, por ndihesha se isha, në shumë mënyra,” tha ai në një intervistë të vitit 2008.
Butterfield shërbeu si ndihmës i Nixon nga 1969 deri në 1973, duke punuar nën Haldeman dhe mbikëqyrur operacionet e Shtëpisë së Bardhë. Ai ishte veteran i Forcave Ajrore dhe më pas u bë administrator i Administratës Federale të Aviacionit.
Pikërisht gjatë një seance pyetjesh rutinë në Senat më 13 korrik 1973, ai pranoi ekzistencën e sistemit të regjistrimit, duke tronditur miqtë dhe kundërshtarët e Nixon-it.
Regjistrimet, të cilat sot ruhen nga Arkivat Kombëtare, zbuluan një portret të pazakontë të Nixon-it: temperament të keq, gjuhë vulgare, paragjykime racore dhe fetare, si dhe mendime të ashpra për figura kombëtare e ndërkombëtare.
Butterfield më vonë tha se ishte i bindur se Nixon e dinte për vjedhjen para se të ndodhte dhe ishte arkitekti i fshehjes. Ai e quajti ish-shefin e tij “i pandershëm” dhe “mashtrues”. Ditën kur Nixon dha dorëheqjen, Butterfield tha se ndjeu një gëzim të madh sepse “drejtësia kishte triumfuar”.
Alexander Porter Butterfield lindi më 6 prill 1926 në Pensacola, Florida. Ai shërbeu 20 vjet në Forcat Ajrore, duke dalë në pension me gradën kolonel. Pas largimit nga FAA, punoi si drejtues biznesi në Kaliforni dhe mori një master në Universitetin e Kalifornisë, San Diego, në vitin 1994.
